“Yaxın zamanlarda beynəlxalq humanitar hüquqa zidd olaraq sərhəd bölgəsində və onun ətrafındakı yaşayış məntəqələrində davam edən, heç bir fərq qoyulmadan edilən hücumlardan narahatıq”.
Bunları BMT-nin insan haqları komissarı Mişel Baçelet Dağlıq Qarabağ münaqişəsi zonasına və onun kənarındakı yaşayış məntəqələrinə atılan mərmi hücumları barədə deyib.
Noyabrın 2-də yayılan bəyanatda komissar hər iki tərəfə xəbərdarlıq edib ki, belə hücumlar beynəlxalq qanunlara uyğun olaraq “hərbi cinayətlər” sayıla bilər.
“Ermənistanı və Azərbaycanı bu raketlərdən istifadəni dayandırmağa, Kaset Bombaları üzrə Konvensiyanı ratifikasiya etmiş 100-dən artıq ölkəyə qoşulmağa çağırıram”
BMT komissarı bildirib.
BMT-nin insan hüquqları rəhbəri ən böyük insan itkisinin 28 oktyabrda baş verdiyini bildirib:
Həmin gün aktiv döyüş əməliyyatları bölgəsindən təxminən 30 km uzaqlıqda olan Bərdə şəhərində 21 nəfərin həlak olub, 70 nəfər yaralanıb”.
Baçelet vurğulayıb ki, Azərbaycan hökuməti sentyabrdan davam edən hərbi əməliyyatlar nəticəsində öz nəzarətindəki ərazilərdə ən azı 91 mülki şəxsin öldüyünü, Ermənistan hökuməti isə Dağlıq Qarabağ münaqişəsi zonasında 45 nəfərin, Ermənistan sərhədləri daxilində isə 2 nəfərin öldüyünü deyir.
Komissarın rəhbərlik etdiyi BMT İnsan Hüquqları Bürosu yuxarıdakı rəqəmləri müstəqil şəkildə təsdiqləyə bilməyib.
İnsan haqları müdafiəçisi müharibə cinayətlərinin törədildiyini göstərən videoyazılardan da ciddi narahat olduğunu və sosial mediada saxta şəkillərin yayıldığını deyib. O, azərbaycanlı hərbçilərin guya erməni əsirləri qətlə yetirdiyi iddia olunan görüntüləri misal çəkib. Lakin Azərbaycanın müdafiə nazirliyi həmin videoların saxta olduğunu bəyan edib.
Nə baş verib: Sentyabrın 27-də səhər saat 6-dan Azərbaycan və Ermənistan silahlı qüvvələrinin təmas xətlərində atəşkəs pozulub. Azərbaycan bu müddət ərzində 4 rayon və 160-dan çox kəndi işğaldan azad etdiyini bəyan edib. Tərəflər arasında 3 dəfə humanitar atəşkəs razılığı imzalansa da, cəbhənin müxtəlif istiqamətlərində döyüşlərin davam etdiyi deyilib.Hər iki tərəf bir-birini atəşkəsi pozmaqda ittiham edir.
