Döyüş əməliyyatları aparılan ərazilərdə videoçəkilişlər edib yayanlarla bağlı cinayət işi başlanılıb, hazırda həmin şəxslərin cinayət əməlləri ilə bağlı istintaq aparılır.
Bu barədə Dövlət Təhlükəsizliyi Xidmətinin noyabrın 4-də yaydığı məlumatda deyilir.
DTX bildirir ki, aidiyyəti dövlət orqanlarının həyata keçirdiyi dövlət sirrinin mühafizəsi tədbirlərinə zidd olaraq və müvafiq xəbərdarlıqlara baxmayaraq, döyüş əməliyyatları aparılan ərazilərdə icazəsiz videoçəkilişlər edilib.
Azərbaycan qoşunlarının strateji və əməliyyat planları, dislokasiyası və yerdəyişmələri, şəxsi heyəti, silah və hərbi texnikaları, digər döyüş təminatı, əməliyyat şəraiti barədə məlumatları əldə etməyə imkan verən müxtəlif videomateriallar yayılıb”
deyə məlumatda qeyd olunub.
Təhlükəsizlik xidməti qeyd olunan videogörüntülərin Ermənistanın ordusu tərəfindən Azərbaycanın qoşun hissələrinin qüvvə və mövqeləri barədə informasiyanın əldə edilməsi üçün istifadə olunduğunu vurğulayıb. Faktlar üzrə DTX-da Cinayət Məcəlləsinin 284-cü (dövlət sirrini yayma) maddəsi ilə cinayət işi başlanılıb.
