Noyabrın 10-dan 11-nə keçən gecə Azərbaycan, Ermənistan və Rusiya ölkə başçıları birgə bəyanat imzalayıb və bununla da atəşkəs bərpa olunub. Bəyanatda eyni zamanda Rusiya sülhməramlılarının Qarabağa yerləşdirilməsi də öz əksini tapıb. Elə sənədin imzalandığı gecə Rusiya sülhməramlıları Qarabağa getmək üçün yola düşüb.
Rusiya sülhməramlıları barədə nələr məlumdur? Azərbaycana neçə sülhməramlı gətirilib? Onların xərclərini hansı ölkə qarşılayacaq? Kontingent il ərzində neçə dəfə dəyişəcək?
Mikroskop Media bu sualların cavabını tapmağa çalışıb.
Rusiya sülhməramlıları barədə nələr bəllidir?
Rusiya BMT Təhlükəsizlik Şurasının daimi üzvü olaraq bütün dünyada sülhün və təhlükəsizliyin qorunmasına cavabdeh ölkələrdən biridir. Bu ölkənin sülhməramlı birləşmələri 15 il əvvəl BMT-nin himayəsi altında yaradılıb. Rusiya qoşunları prezidentin qərarına əsasən və MDB, BMT, ATƏT, NATO-Rusiya Şurasının və lazım olduqda Şanxay Əməkdaşlıq Təşkilatının maraqlarına uyğun olaraq sülhməramlı kontingentlərə ayrıla bilər.
Bununla yanaşı, Rusiya BMT missiyalarına da hərbi müşahidəçilər göndərir və bu qurumda ən çox hərbi müşahidəçisi olan ilk 10 ölkədən biridir. Hazırda bu ölkənin sülhməramlı kontingenti Yaxın Şərq, Qərbi Saxara, Konqo Demokratik Respublikası, Fildişi Sahili, Liberiya və Sudanda xidmət edir.
Azərbaycana neçə sülhməramlı gətirilib?
Azərbaycana gətirilən Rusiya sülhməramlı qüvvələrinin tərkibi bəyanatda da öz əksini tapıb. Onlar 1960 atıcı, 90 zirehli personal daşıyıcı, 380 maşın və digər texnikadan ibarətdir.
Sülhməramlıların xərclərini hansı ölkə ödəyəcək?
Rusiya prezidenti Vladimir Putin Dağlıq Qarabağda yerləşdirilən sülhməramlıların maliyyə dəstəyi ilə bağlı hökumətə tapşırıq verib.
Tapşırığa əsasən:
- Sülhməramlı kontingentin öz fəaliyyətini gerçəkləşdirməsi ilə əlaqədar bu kontingentdən olan hərbi qulluqçuların maddi təminatı təşkil olunacaq;
- Onların ailə üzvlərinə əlavə zəmanətlər təqdim edilməklə müəyyən olunmuş qaydada maliyyə xərcləri təmin ediləcək .
Kontingent il ərzində neçə dəfə dəyişəcək?
Qərara əsasən, rusiyalı sülhməramlı kontingenti ildə ən azı 2 dəfə dəyişdirilməlidir. Hərbi texnika isə ehtiyatlar sərf olunduqca və texniki cəhətdən ehtiyac yarandıqca dəyişdirməlidir.
Sülhməramlılar hansı dilləri bilməlidir?
Sülhməramlılar bir qayda olaraq ingilis dilini bilməlidirlər. Bəzən isə fransız dili də əlavə dil kimi tələb oluna bilər. Sülhməramlılara yerli əhaliyə hörmətlə yanaşmaq və Cenevrədə təsdiqlənmiş müasir müharibə qanunlarına əməl etmək barədə təlimlər keçirilir. Bu təlimləri “Qırmızı Xaç” və digər beynəlxalq təşkilatların nümayəndələri həyata keçirir.
