Bu il iyulun 14-dən 15-nə keçən gecə Bakıda orduya dəstək məqsədilə baş tutan yürüşdən sonra həbs olunanlardan 21-i ev dustaqlığına buraxılıb.
Bu barədə vəkil Asabəli Mustafayev məlumat yayıb. Vəkil bildirib ki, noyabrın 16-da Səbail rayon məhkəməsi prokurorluğun vəsatəti əsasında saxlanılan 36 nəfərdən 21-i barəsindəki həbs-qətimkan tədbiri qərarını dəyişib.
Ev dustaqlığına buraxılanların 12-i Azərbaycan Xalq Cəbhəsi Partiyasının (AXCP) üzvüdür. Onların arasında partiyanın Rəyasət Heyətinin üzvləri Fuad Qəhrəmanlı, Asif Yusifli, Məmməd İbrahim, Bəxtiyar İmanov, Ayaz Məhərrəmli də var.
Partiyanın sərbəst buraxılan digər üzvləri:
1. Baba Süleymanov
2.Ceyhun Novruzov
3.Ismayıl Həsənov
4.Müşviq Quliyev
5.Telman Seyfullayev
6.Məhəbbət Nağıyev
7. Seymur Əhmədov
Başqa kimlər ev dustaqlığına buraxılıb:
- Naxçıvan MR daxili işlər nazirinin sabiq müavini Səyavuş Mustafayev
- Azərbaycan Demokratiya və Rifah Hərəkatının üzvü Pərvin Çobanov
- “Müsəlman Birliyi” Hərəkatının iki üzvü Kamil Mahmudov
- “Müsəlman Birliyi” Hərəkatının iki üzvü Tural Vəliyev
Nə baş verib: İyulun 12-də Azərbaycan-Ermənistan sərhədində Tovuz istiqamətində döyüşlər baş tutub. Nəticədə Azərbaycan ordusunun general-mayoru Polad Həşimov, daha 11 hərbi qulluqçu və 1 mülki şəxs həlak olub.
Döyüşlərdən sonra iyulun 14-dən 15-nə keçən gecə Bakıda orduya dəstək məqsədilə yürüş keçirilib.
Bir qrup şəxs Milli Məclisin binasına daxil olandan sonra polis aksiyanı dağıdıb, iştirakçılarla polis arasında toqquşma yaranıb. Rəsmi məlumata görə, bir neçə polis əməkdaşı bədən xəsarətləri alıb, xidməti avtomobillərə və toplantının keçirildiyi ərazinin yol infrastrukturuna ciddi ziyan dəyib.
Baş Prokurorluğun İstintaq İdarəsi özgə əmlakına ziyan vurma, hakimiyyət nümayəndəsinə qarşı zor tətbiqetmə, ictimai asayişin pozulması və xəstəlik yaymaq ittihamları ilə istintaq başladıb.
