Bu il sentyabrın 27-dən Azərbaycan və Ermənistan arasında döyüşlər başladı. Nə döyüşlər gedən dövrdə, nə də döyüşlərdən sonra keçən 7 gün ərzində Azərbaycan tərəfi itkilərin sayını açıqlamayıb.
Dövlət rəsmiləri döyüşlər gedən vaxt itkilərin sayının açıqlanmamasını ruh düşkünlüyü yaratmaması ilə əsaslandırırdılar. Bəs müharibə bitəndən sonra itkilərin sayı barədə ictimaiyyətə niyə məlumat verilmir? Mikroskop bunun cavabını Müdafiə Nazirliyindən öyrənməyə çalışıb.
MN mətbuat katibi Anar Eyvazov deyib ki, bu məsələ birbaşa prezident İlham Əliyevin nəzarəti altındadır.
MN mətbuat katibi Anar Eyvazov:
Azərbaycanla Ermənistanın itkisi müqayisə olunmazdır və Ermənistanın itkisi həddindən artıq çoxdur. Bu məsələ birbaşa prezidentin nəzarəti altındadır. Hazırda dəqiqləşdirmə aparılır, ictimaiyyətə cavab veriləcək.
MN mətbuat katibi Vaqif Dərgahlı:
Ali baş komandan dedi ki, müharibədən sonra itkilərlə bağlı məlumat veriləcək. Səsləndiriləndə bilinəcək.
Ermənistan tərəfi hərbi itkiləri barədə nə deyir?
Ermənistan tərəfi Azərbaycandan fərqli olaraq hərbi itkilərlə bağlı təxmini rəqəmləri açıqlayıb. Ölkənin Səhiyyə Nazirliyinin yaydığı məlumata görə, döyüşlərdə azı 2 300 erməni hərbçisi həlak olub. Nazirliyin mətbuat katibi Alina Nikoğosyan bildirib ki, meyitləri Azərbaycanın nəzarətindəki ərazilərdə qalan hərbçilər bu siyahıyada yer almır və onların ümumi sayı bəlli deyil.
Paşinyan nə deyir?
Ermənistanın Baş naziri Nikol Paşinyan deyib ki, Qarabağda itkin düşən yüzlərlə əsgər var.
2400-dən çox itkimiz var. Qarabağ müdafiə ordusu əvvəlki statusuna sahib olacaq, onu daha da gücləndirəcəyik. Bəyanatdakı müddəaları dəyişə bilmərik. Qarabağdakı uğursuzluğa görə məsuliyyət mənim üzərimdədir”.
Putin hər 2 tərəfin itkiləri barədə danışıb
Rusiya prezidenti Vladimir Putin oktyabrın 22-də açıqlayıb ki, onlarda olan məlumata görə, münaqişə başlayandan hər iki tərəf ümumilikdə 5000-ə yaxın itki verib.
Ölən mülki şəxslərlə bağlı isə vəziyyət fərqlidir
Döyüşlərin davam etdiyi 44 gün ərzində Azərbaycan və Ermənistan tərəfi mülki şəxslər arasında ölən və yaralananların sayı barədə mütəmadi məlumat yayıb. Azərbaycan Baş Prokurorluğunun məlumatına görə, atəşkəs pozulandan bəri 94 mülki şəxs öldürülüb, 414 mülki şəxs yaralanıb.Ermənistan rəsmilərinin məlumatına görə isə həmin müddət ərzində Dağlıq Qarabağda 49 mülki şəxs həlak olub, 157-si isə yaralanıb.