Fransa senatı Parisi Dağlıq Qarabağın müstəqilliyini tanımağa çağıran qətnaməyə baxacaq. Sözügedən sənəd noyabrın 18-də parlamentin saytında yerləşdirilib.
Qətnamənin müəlliflərindən biri senator Bruno Retayonun “Twitter”-də bildirib ki, layihə noyabrın 25-də nəzərdən keçiriləcək.
Nə baş verib: Rəsmi Paris sentyabrın 27-də Dağlıq Qarabağda başlamış münaqişədə Yerevanı dəstəkləyib. Münaqişə başa çatdıqdan sonra da Fransa prezidenti Emmanuel Makron Ermənistanın baş naziri Nikol Paşinyan ilə söhbəti zamanı Ermənistana və onun xalqına olan dostluq hislərini ifadə edib.
Senatın qərarı nə deməkdir: Fransa senatının, yəni parlamentin yuxarı palatasının qərarları tövsiyə xarakteri daşıyır və icra orqanları onlara riayət etmək məcburiyyətində deyil.
Qondarma Dağlıq Qarabağ Respublikası nədir: 1992-ci ilin yanvarında rəsmən “müstəqillik” elan edib. Lakin Ermənistan da daxil olmaqla, BMT-ə üzv olan heç bir ölkə tərərfindən müstəqilliyi tanınmayıb. Dağlıq Qarabağ BMT də daxil olmaqla, bütün dünya dövlətləri Azərbaycanın ərazisi olaraq tanınır.
Dağlıq Qarabağın “müstəqilliyini” kim tanıyıb:
BMT üzvü olmayan Abxaziya, Cənubi Osetiya və Dnestryanı tərəfindən tanınır.
