Azərbaycan Ermənistanın keçmiş müdafiə naziri Seyran Ohanyan barəsində axtarış qərarı verib.
Baş Prokurorluğunun noyabrın 23-də yaydığı məlumatda deyilir ki, bu barədə Bakı Hərbi Məhkəməsi qərar çıxarıb.
Prokurorluq Ohanyanla bağlı beynəlxalq axtarış elan olunması üçün İnterpola müraciət edəcək.
S.Ohanyan barəsində başlanmış cinayət işinin istintaqı Hərbi Prokurorluqda aparılır və onun barəsində həbs-qətimkan tədbiri seçilib.
Nədə ittiham olunur: S.Ohanyan 1992-ci il fevralın 26-da Xocalıda baş verən hadisələrin təşkilində ittiham olunur.
Hansı maddə ilə: Keçmiş nazir Azərbaycan Cinayət Məcəlləsinin 103-cü (soyqırımı) maddəsi ilə ittiham olunur. Bu maddə 14 ildən 20 ilə qədər və ya ömürlük həbs cəzası nəzərdə tutur.
Xocalıda nə baş verib: 1992-ci il fevralında 25-dən 26-a keçən gecə Ermənistan SQ ilə Rusiyanın 366-cı motoatıcı alayının zirehli texnikası və hərbi heyətinin köməyi ilə Xocalını işğal edib.
İşğal nəticəsində 63-ü uşaq olmaqla, 613 nəfər qətlə yetirilib,150 nəfər isə itkin düşüb.
