Belarus müxalifətinin lideri Svetlana Tixanovskaya BBC-nin tərtib etdiyi 2020-ci ilin ən nüfuzlu 100 qadını siyahısına daxil edilib. Onun adı layihənin “Liderlik” kateqoriyasında qeyd olunub.
BBC Tixanovskayanın 2020-ci ildəki fəaliyyətini belə təsvir edib:
Svetlana Tixanovskaya – milli demokratik hərəkata rəhbərlik etdiyi Belarusda prezidentliyə keçmiş namizəddir. 2020-ci ilin avqustunda pezident Aleksandr Lukaşenko seçkilərdə böyük üstünlük qazandığını elan etdi. Bu, səslərin saxtalaşdırıldığı ilə bağlı çoxsaylı ittihamlar fonunda ölkədə etirazlara səbəb oldu. Seçkidən qısa müddət sonra uşaqlarının təhlükəsizliyindən qorxan Svetlana Belarusdan Litvaya qaçdı və demokratik hərəkata rəhbərliyi sürgündə davam etdirir”.
Bu il BBC ilham verən və dəyişikliyə təşəbbüs göstərənləri ilin ən nüfuzlu 100 qadını siyahısında namizəd kimi göstərib. Onların arasında Finlandiyanın Baş naziri Sanna Marin və Oxford Universitetində koronavirusa qarşı peyvənd hazırlamaq üçün araşdırmalar aparan Sarah Qilbert də var.
Koronavirus pandemiyası zamanı həyatını başqaları üçün qurban verənlərə ithafən ən nüfuzlu 100 qadın siyahısındakı bir sətir boş buraxılıb.
100 qadın layihəsi nədir:
BBC-ə məxsus bu layihədə hər il bütün dünyadan ilhamverici və nüfuzlu qadınların siyahısı dərc edilir. Layihə 60-dan çox ölkədən 15-94 yaşlı qadınları əhatə edir.
İndiyədək Azərbaycandan bu siyahıya kimlər düşüb:
2013: Firuzə Əliyeva – Azərbaycan Diplomatik Akademiyasının (ADA) bakalavr mərhələsinə tələbə qəbulu üzrə direktor müavini
2014: Səbinə Kurqunayeva – futbolçu
2014: Arzu Qeybulla – jurnalist
2016: Xədicə İsmayıl – jurnalist
2018: Reyhan Camalova – yağış suyundan enerji istehsal edən “Rainergy” qurğusunun ixtiraçısı
