Həlak olan erməni hərbçilərinin meyitləri üzərində təhqiredici hərəkətlər etməkdə ittiham edilən dörd azərbaycanlı hərbi qulluqçu həbs edilib.
Bu barədə Baş Prokurorluğun dekabrın 14-də yaydığı məlumatda deyilir.
Bəzi kütləvi informasiya vasitələri və sosial media səhifələrində yayılan Azərbaycanın hərbi qulluqçularının döyüş əməliyyatları zamanı həlak olan erməni hərbçilərinin meyitləri üzərində təhqiredici hərəkətlər etmələrini, habelə əsir götürülən erməni hərbçiləri ilə qeyri-insani rəftarını əks etdirən videogörüntülər təhlil edilərək öyrənilmiş, bəzi videoçarxların saxta olması müəyyən edilsə də, bəzilərinin doğru olmasına və reallığı əks etdirməsinə ciddi şübhələr yaranıb”
Prokurorluğun məlumatında qeyd olunub.
Hansı maddələrlə cinayət işi açılıb: Hərbi Prokurorluq həmin görüntülərlə bağlı Cinayət Məcəlləsinin iki maddəsi ilə cinayət işi başladıb:
- 115.2-ci maddə – işgəncə vermə, onlarla qəddar və ya qeyri-insani rəftar etmə
- 245-ci maddə – qəbir və ya meyit üzərində təhqiredici hərəkət
Kimlər saxlanılıb: Prokurorluğun məlumatına görə, kiçik gizirlər Rəşad Əliyev və Qardaşxan Abışovun Zəngilan rayonunda erməni hərbçilərinin meyitlərinin üzərində təhqiredici hərəkətlərə yol verib. İstintaq onların bu hadisəni mobil telefonla videoqeydə alıb sosial şəbəkələr vasitəsilə digər şəxslərə göndərməyinə dair əsaslı şübhələr müəyyən edib.
Saxlanılan daha iki şəxs isə əsgərlər Arzu Hüseynov və Ümid Ağayevdir. Onlar Xocavənd rayonunun Mədətli kəndi ərazisində yerləşən qəbiristanlıqda ermənilərə məxsus qəbir daşlarını dağıtmaqla onların üzərində təhqiredici hərəkətlərə yol verməkdə təqsirli bilinir. Həmin əsgərlərin də bunu videoqeydə alaraq yaymağına dair şübhələr müəyyənləşib.
Nə qərar verilib: Adları çəkilən 4 hərbi qulluqçu təqsirləndirilən şəxs qismində cəlb olunmaqla onlar barəsində məhkəmənin qərarı ilə həbs qətimkan tədbiri seçilib.
Prokurorluq bildirib ki, hazırda sosial mediada yayılan digər videogörüntülərlə bağlı da araşdırma aparılır və nəticələri barədə ictimaiyyətə ətraflı məlumat veriləcək