Amerik Birləşmiş Ştatları Türkiyə hərbi sənayesinin rəhbərinə və daha 3 rəsmisinə sanksiyalar elan edib.
Dekabrın 14-də elan olunmuş sanksiyalar Türkiyənin Rusiyadan S-400 hava hücumundan müdafiə sistemləri almasına cavab olaraq tətbiq edilib.
Bundan əvvəl ABŞ Türkiyəni Rusiyadan S-400 raket sistemləri aldığına görə F-35 qırıcı təyyarəsi proqramından xaric etmişdi.
ABŞ sanksiyaları necə əsaslandırır: ABŞ bunu S-400 raketlərinin NATO sisteminə uyğun olmadığı ilə əsaslandırır. ABŞ-ın dövlət katibi Mayk Pompeo S-400 raketlərinin ölkəsinin hərbi texnologiyası və heyəti üçün təhlükəli olduğunu deyib və Türkiyəni S-400 problemini dərhal həll etməyə çağırıb.
Türkiyə nə deyir: Türkiyə ABŞ-ın sanksiyalarını “pisləydiyini və rədd etdiyini” bildirib:
Türkiyə bu qərarın əleyhinə zəruri olan addımları atacaq və bu, münasibətlərimizə labüd təsir edəcək”.
Rəsmi Ankara ABŞ istehsalı olan “Patriot” raketlərini ala bilmədiyinə görə S-400 raketləri almağa məcbur olduğunu da bəyan edib.
Bu sanksiyalar Türkiyəyə necə təsir edə bilər:
- ABŞ-ın sanksiyaları Türkiyə müdafiə sənayesini ixrac lisenziyalarından və kreditlərdən məhrum edə bilər;
- ABŞ-ın İxracat-İdxal Bankının Müdafiə Sənayesi Başçılığına verdiyi dəstəkdən məhrum edilə bilər;
- Sanksiyalar tətbiq ediləcək məmurlar ABŞ-dakı vardövlətdən məhrum edilər bilər.
Azərbaycan nə deyir: Rəsmi Bakı ABŞ-ın Türkiyəyə sanksiya tətbiq etməsi qərarını qınayan bəyanat verib. Azərbaycan bu addımı ikili standartların tətbiq edilməsi kimi qiymətləndirib:
Azərbaycan, hər zaman olduğu kimi, Türkiyənin yanındadır və onun beynəlxalq hüquqa və ədalətə əsaslanan mövqeyini dəstəkləyir”.
Rusiya nə deyir: Rəsmi Moskva sanksiya qərarını beynəlxalq hüquqa təkəbbürlü münasibətin təzahürü adlandırıb:
ABŞ-ın illərdir istifadə etdiyi qeyri-qanuni, birtərəfli məcburetmə tədbirlərinin göstəricisidir. Bu cür addımlar beynəlxalq arenada ABŞ-ın nüfuzunu artırmır”.
S-400 nədir: Rusiyanın Mərkəzi Dizayn Bürosu tərəfindən istehsal olunan zenit raket kompleksidir və 2007-ci ildən istehsal olunur. S-400 hazırda mövcud olan hava hücumundan müdafiə sistemləri arasında ən yaxşılardan biri hesab olunur.
