Rusiya prezidenti Vladimir Putin dekabrın 17-də ənənəvi illik mətbuat konfransı keçirib. Mətbuat konfransı zamanı V.Putin həmçinin Rusiyanın Qarabağla bağlı mövqeyi, vəziyyətin xaricdən müdaxilə ilə nəzarətdən çıxması iddiaları, Qarabağın statusu, üçtərəfli razılaşmanın əsas nəticəsi, bölgədə Rusiya sülhməramlılarının sayının artırılması və digər məsələlərlə bağlı sualları cavablandırıb.
Mikroskop Media mətbuat konfransından Qarabağla bağlı çıxarışları təqdim edir:
Rusiyanın Qarabağla bağlı mövqeyi barədə
Rusiyanın mövqeyi həmişə belə olub: qan tökülmədən razılığa gəlməliyik. Rusiya, ABŞ və Fransanın həmsədr olduğu Minsk qrupundakı mövqeyimiz də belə formalaşıb.
Vəziyyətin xaricdən müdaxilə ilə nəzarətdən çıxması iddiaları barədə
Vəziyyət nəzarətdən çıxıb, bu gərginlik uzun illər boyu davam edib. Bunun xaricdən hansısa müdaxilə nəticəsində baş verdiyini düşünmürəm. Toqquşmalar, qarşılıqlı atışmalar və kiçik münaqişələr dəfələrlə olub. Nəticədə bu, müharibəyə çevrilib.
Qarabağın statusu barədə
Rusiya illər boyu belə bir mövqedən çıxış edib ki, Qarabağ ətrafındakı 7 rayon Azərbaycana qaytarılmalı, regionda status-kvo müəyyənləşdirilməlidir. Qarabağın statusu dəyişməz olaraq qalmalı və gələcəkdə həll olunmalıdır.
Üçtərəfli razılaşmanın əsas nəticəsi barədə
Hərbi əməliyyatların dayandırılmasına dair razılaşma çox vacibdir, çünki qan tökülməsini dayandırır – insanlar həyatlarını itirmir. Bu, son dərəcə vacib bir şeydir, qalan hər şey ikinci dərəcəlidır. İnsanların həyatını və sağlamlığını qorumaq, həll etdiyimiz ən vacib vəzifədir.
Bölgədə Rusiya sülhməramlılarının sayının artırılması barədə
Sülhməramlılarımızın sayının artırılması mümkündür, lakin bu, yalnız münaqişə tərəflərinin razılığı ilə həyata keçirilə bilər.
Türkiyənin mövqeyi barədə
Qarabağ məsələsində Türkiyənin mövqeyi bu ölkənin Azərbaycanın haqq işini müdafiə etməsinə əsaslanır. Ermənistan özü də Qarabağın müstəqilliyini tanımayıb və beynəlxalq hüquq nöqteyi- nəzərindən bu, Azərbaycan ərazisidir.
Növbəti mərhələdə nəzərdə tutulanlar barədə
Növbəti mərhələdə regionda münasibətlər tam normallaşdırılmalı, iqtisadi və infrastruktur potensialı üzə çıxarılmalıdır. Bu, avtomobil yollarına və dəmir yollarına, Naxçıvana yola da aiddir.
Atəşkəsin pozulması barədə
Atəşkəs rejiminin pozulması məsələsinə gəldikdə, belə hadisə bir dəfə olub və ümidvaram ki, bu, yeganə hal kimi qalacaq.
