Rusiyanın Dağlıq Qarabağdakı Humanitar Minalardan Təmizləmə Mərkəzinin hərbi qulluqçuları Xankəndidədi məktəb şagirdləri üçün sülhməramlılıq təlimi keçiblər. Rusiya müdafiə nazirliyinin dekabrın 25-də yaydığı xəbərə görə, şagirdlərə sülhməramlıların sülhü qoruma fəaliyyətinin xüsusiyyətləri və detalları barədə danışılıb.
Bundan əlavə, partlayıcı obyektlər aşkar edərkən təhlükəsizlik tələblərinə riayət olunması və ilk tibbi yardım qaydaları barədə dərslər keçirilib.
Dərslərdə ümumilikdə 80-dən çox şagird, müəllim və məktəblilərin valideynləri iştirak edib.
Təlimlərin keçirildiyi sinif otaqlarına Rusiyanın bayrağı ilə yanaşı qondarma Dağlıq Qarabağ respublikasının da bayrağı qoyulub.
Nə baş verib: Sentyabrın 27-də Azərbaycan və Ermənistan arasında müharibə başlayıb. 44 gün davam edən döyüşlər noyabrın 10-da Rusiya, Azərbaycan və Ermənistan arasında imzalanan atəşkəs razılaşması ilə başa çatıb. Razılaşmalara əsasən, Laçın dəhlizində və qoşunların təmas xəttində Rusiya sülhməramlıları yerləşdirilib.
