Qazax, Tovuz, Ağstafa, Gədəbəy, Şəmkir rayonlarını əhatə edən Regional Su İdarəsinin işçilərini “YAŞAT” Fonduna hər ay pul köçürməyə məcbur edildiyi barədə məlumat yayılıb. Azadlıq qəzeti yazır ki, bu barədə onlara işçilər xəbər verib. Məlumatda deyilir ki, bütün əməkdaşlar bir il ərzində hər ay əməkhaqqının bir faizini (təxminən 6 manat) fonda köçürməlidirlər, buna etiraz edənlərdən isə izahat alınır.
YAŞAT nə deyir: İddialarla bağlı sualları “YAŞAT”-ın əməkdaşı sualları cavablandırıb. Qaynar xəttin əməkdaşı bildirib ki, məcburi ianədən söz gedə bilməz.
“Heç kim işçiləri məcbur edə bilməz ki, fonda ianə etməlisən. “YAŞAT” fonduna ödəniş etmək könüllü şərtlərlə həyata keçirilir. Fonda ianə edilməsi şəxsin öz istəyindən asılıdır. Vətəndaş olaraq , istəyə görə işdən əlavə , öz hesabından fonda ianə edilə bilər. “YAŞAT” da hər şey könüllü əsaslarla baş tutur”.
YAŞAT fondu nədir: Dekabrın 8-də prezident İlham Əliyevin fərmanı ilə “YAŞAT” fondu yaradılıb. Fondun yaradılmasında məqsəd ölkənin ərazi bütövlüyünün müdafiəsi ilə əlaqədar yaralananların və həlak olanların ailələrinin təminatına dəstəkdir. Fondun maliyyə mənbəyi könüllü ianələr və qanunla qadağan olunmayan digər mənbələrdir.