Yanvarın 26-da Azərbaycan Meliorasiya və Su Təsərrüfatı ASC əməkdaşlarının əməkhaqlarından hər ay müəyyən faizinin “YAŞAT” Fonduna köçürülməsi ilə bağlı qərar qəbul edib. Fonda köçürülmə ilə bağlı qurumun yaydığı məlumatda əmək haqlarından neçə faiz tutulacağı və bunun nə qədər müddət davam edəcəyi açıqlanmayıb.
Meliorasiya və Su Təsərrüfatı ASC-nin mətbuat katibi Dilqəm Şərifov Mikroskop-a bildirib ki, qurum dekabrın 17-i “YAŞAT” fonduna 200 000 AZN ianə edib:
“YAŞAT” fondu olduğu müddətcə biz bu fonda köməklik edəcəyik”.
Dilqəm Şərifov əməkdaşların maaşından neçə faiz tutulacağı barədə məlumatı isə açıqlamayıb:
“Faiz məsələsini biz açıqlamırıq. Nə məlumat yazılıbsa, odur. Əməkdaşların maaşından neçə faiz tutacağına dair məsələsini biz qeyd etmirik. Rəhbərlik deyib ki, onu deməyə ehtiyac yoxdur, ona görə də məlumatda bu barədə heç nə bildirməmişik”.
Mətbuat katibi deyib ki, əməkhaqlarından tutulacaq faizlə bağlı detalları yalmız rəhbərliyin icazəsi ilə açıqlaya bilər:
“Rəhbərlikdən soruşuram, mənə icazə versələr, zəng edib sizə deyərəm. Mən istənilən məlumatı rəhbərliyin icazəsi ilə verirəm. Çünki mənim dediyim söz birbaşa qurumun rəsmi sözüdür, ona görə özbaşına sizə heç nə deyə bilmərəm”
Nə baş verib: Prezident İlham Əliyevin 2020-ci il dekabrın 8-də “YAŞAT” fondunun yaradılması ilə bağlı fərman imzalayıb. Fondun yaradılmasında məqsəd ölkənin ərazi bütövlüyü uğrunda yaralanan və həlak olanların ailələrinin təminatına dəstəkdir.