Tələbə Güc Mərkəzinin sədri, tələbə Əhməd Məmmədli Lənkəran Dövlət Universiteti qarşısında aksiya edərkən saxlanılıb. Aksiyanın məqsədi LDU tələbələrinin problemlərinin həllini tələb etmək olub.
Tələbə Güc Mərkəzi məsələ ilə əlaqədar bəyanat səsləndirmək istəsə də buna imkan verilməyib və Ə.Məmmədli polis tərəfindən saxlanılaraq Lənkəran Şəhər Rayon Polis Şöbəsinə aparılıb.
LDU tələbəsi Orxan İsgəndərli isə universitetə gələrkən yolda saxlanılıb və polis şöbəsinə aparılıb.
Niyə aksiya keçirilib: Bir neçə gün öncə Tələbə Güc Mərkəzinə Lənkəran Dövlət Universiteti tələbələrindən kütləvi şikayət daxil olub. Şikayətlər imtahanlar və tələbələrin topladıqları ballarla əlaqıdar olub.
Nə baş verib: Müəllimlər tələbələrə imtahandan yüksək bal aldıqlarını bildirsələr də yekunda universitetin elan etdiyi ballar əksinə, xeyli aşağı olub. Universitet tələbələri obyektiv və ədalətli apelyasiya baxışı keçirilməsini tələb ediblər.
Univeristet nə deyir: Tələbə Güc Mərkəzi LDU rəhbərliyi ilə əlaqə saxlasa da , universitet rəhbərliyi onlara “sizə hesabat vermək məcburiyyətində deyilik, necə edəcəyimizi özümüz bilərik” deyə cavab verib.
Polis nə deyir: Mikroskop məsələ ilə bağlı Lənkəran Şəhər Polis şöbəsi ilə əlaqə saxlayıb, amma onlar məlumatı təkzib edib:
Bizim bu barədə heç bir məlumatımız yoxdur. Olmayan bir şeyi deyə bilmərik . Sizdən eşitdik bu məlumatı.