Abşeron rayonu Fatmayı və Görədil kənd sakinləri avtobus qıtlığından şikayətçidirlər. Sakinlərinin sözlərinə görə, 108A və 134 nömrəli avtobuslar sistemdə 10-12 ədəd nəzərdə tutulsa da, onlardan cəmi 6-sı sərnişin daşıyır:
Avtobuslardan 2-si də elə yolda xarab olur. Hazırda işlək vəziyyətdə olan cəmi 4 avtobus var.
Sıxlıqdan gileylənən kənd sakinləri deyir ki, sürücüyə bu barədə şikayətlərini deyəndə də onlar kifayət qədər avtobusun olmadığını deyir.
Kənd sakinləri həm də deyir ki, avtobuslar təmirsizdir:
Marşrut avtobuslarıınn təmirinə məsuliyyətsiz yanaşılır. Səhər təmir olunan avtobuslar günortaya xarab olur. Məsələyə başdansovdu yanaşılır.
deyə kənd sakinləri bildirib.
Bakı Nəqliyyat Agentliyinin mətbuat katibi Mais Ağayev Mikroskop-a bildirib ki, həmin marşrut xətti “Monella” MMC şirkətinin müvəqqəti istismarındadır.
O sərnişindaşınmaların vəziyyəti həqiqətən də qənaətbəxş deyil. Sərnişinlərdən dəfələrlə bizə də bu istiqamətdə şikayətlər daxil olub. BNA “Monella “MMC-nin rəhbəri Qurbanəli İsmayılov qarşısında dəfələrlə məsələ qaldırılıb. Təəssüf ki, hələ də müsbət nəticə yoxdur.
Mais Ağayev deyir ki, analoji hal digər marşrut xətlərində də olub və qurum həmin şirkətlə yollarını ayırıb:
Əgər daşıyıcı qoyulan tələblərə əməl etmir və problemləri aradan qaldırmırsa, o şirkətlə yollarımızı ayırırıq. Həmin daşıyıcıdan marşrut xətlərinin istismarı da alınır və işinə məsuliyyətli yanaşan daşıyıcıya həvalə olunur. Eyni aqibət “108A” avtobusunu da gözləyir. Həmin marşrut xətti ilə bağlı da eyni qərar qəbul edilib, icra olunacaq.