Fevralın 18-i belaruslu jurnalistlər Yekaterina Baxvalova (27 yaş) və Darya Çultsovanın (23 yaş) hər biri iki il müddətinə azadlıqdan məhrum edilib. Minsk Frunzensk Rayon Məhkəməsi Belsat kanalının əməkdaşı olan jurnalistləri ictimai asayişi pozmaqda təqsirli bilib.
Onlar mülki geyimli polislər tərəfindən döyülərək öldürülən etirazçı Roman Bondarenkonun ölümü ilə bağlı aksiyada çəkiliş edən zaman, noyabrın 15-i saxlanılıb. Belsat-ın məlumatına görə, fevralın 17-də keçirilən məhkəmədə Prokuror Alina Kasyanchyk jurnalistlərin öz reportajları ilə insanları kütləvi etirazlara qoşulmağa çağırdıqlarını bildirib.
Jurnalistlər nə deyir: Məhkəmədə çıxış edən Baxvalova ittihamların uydurma olduğunu bildirib. Onlar deyib ki, nümayişdə yalnız jurnalist kimi işlərini görmək üçün iştirak ediblər.
Roman Bondarenko kimdir: Aleksandr Lukaşenko əleyhinə aksiyalarda iştirak edən 31 yaşlı rəsm müəllimi Roman Bondarenko döyülüb və aldığı xəsarətlər nəticəsində həlak olub. Hüquq müdafiəçiləri deyir ki, R. Bondarenko mülki geyimli polislər tərəfindən döyülüb.
Nə baş verib: Belarusda avqustun 9-da keçirilən prezident seçkilərindən sonra rəsmi məlumata görə, Aleksandr Lukaşenko 6-cı dəfə prezident seçilib. Bundan sonra bütün ölkə boyu seçki nəticələrinə etiraz aksiyaları keçirilib. Hüquqları müdafiəçiləri deyir ki, həftələrlə davam edən etiraz aksiyalarında 30 mindən çox insan saxlanılıb və onların böyük qismi vəhşicəsinə döyülüb.
Ölkə rəsmiləri nə deyir: Hakimiyyət rəsmiləri fiziki zorakılıqla bağlı iddiaları rədd edir və bu cür iddialar irəli sürən insanları Qərbin maliyyələşdirdiyi təxribatçı adlandırır.