AXCP üzvü Babək Həsənli prezidentin imzaladığı əfv sərəncamından sonra azadlığa buraxılan siyasi məhbuslardan biridir. O, 2018-ci ilin mayında saxlanılıb. Partiya fəalına 3 il azadlıqdan məhrumetmə cəzası verilib. Foto reportyor Firi Səlimin Mikroskop Media üçün çəkdiyi fotoreportajı təqdim edirik!
Həbsdən azad edilməyi bütün dostlarıma arzu edirəm. Təssüf ki, bir hissəsini azad etdilər. Bir hissəsi isə hələ də həbsdədir. Hesab edirəm ki, həbsim siyasi mahiyyət daşıyır. Hesab edirəm ki, İlham Əliyev sırf siyasi rəqiblərini sıradan çıxartmaq üçün bizi həbs etmişdi.
Həbsimizin mahiyyəti ondan ibarətdir ki, rejim 30 ildir ki, ölkədə informasiya blokadası yaradıb, cəmiyyəti çaşdırır, yalan informasiyalar verir. Yaranmış blokadanı müasir informasiya texnologiyaları ilə sosial şəbəkələr vasitəsilə ortadan qalxdı. Sosial şəbəkələr vasitəsilə AXCP üzvlərinin və partiya sədrinin yaydığı informasiyalar nəticəsində hakimiyyət qorxuya düşərək partiya sədrini təcrid etmək qərarına gəldi. Və şou qurdu. Şounun nəticəsində biz həbs edildik. Təxminən 3 ildir həbsdəyik.
Həbs bizi qorxutmur. Biz bu yola çıxanda bunu nəzərə almışıq. Hesab edirəm ki, biz ölkəyə müstəqillik gətirən bir təşkilatın üzvləriyik. Sonunda demokratiyanı da gətirəcəyik! Bunun uğrunda mübarizəmiz sona qədər davam edəcək. Həbslər bizə daha da cəsarət verir!
