6 mayda Operativ Qərargah brifinq keçirib. Brifinqdən əsas məqamları təqdim edirik.
Kimlər iştirak edib: Səhiyyə nazirinin birinci müavini, səhiyyə nazirinin vəzifələrini müvəqqəti icra edən Teymur Musayev və Tibbi Ərazi Bölmələrini İdarəetmə Birliyinin (TƏBİB) Xəstəliklərin profilaktikası və kontrolu departamentinin müdiri Yaqut Qarayeva.
Məhdudiyyətlər barədə: Ramazan bayramı günlərində əlavə məhdudiyyət tətbiq olunmayacaq. Yeganə məhdudiyyət ictimai nəqliyyatla bağlıdır.
Vaksinasiya barədə: 10 mayda 18 yaşına çatmış bütün Azərbaycan vətəndaşları vaksinasiya prosesinə qoşula biləcək. Tibb işçiləri arasında məqsəd qruplarının 90 faizi artıq vaksinasiya olunub. Ölkəyə Sputnik-V vaksini gətirilib. İndiyədək 600 min nəfərə ikinci doza vaksin vurulub.
Yoluxmalar barədə: Yoluxmaların sayında mərhələli şəkildə enmə müşahidə olunur. Yoluxma əmsalı 10 %-ə yaxınlaşır. Hazırda Azərbaycanda epidemioloji vəziyyət nəzarət altında saxlanlır. 30-59 yaş arası insanlarda yoluxma halları çox olur və bu göstərici həmişə eyni olub. Bakıda ən çox yoluxma Binəqədi və Xətaidə qeydə alınıb. Regionlarda koronavirusa yoluxma ilə bağlı ciddi dəyişiklik yoxdur və vəziyyət sabit olaraq qiymətləndirilə bilər.
