İctimai fəal Bayram Məmmədovun müəmmalı ölümünə etiraz olaraq Bakıda divarlara “Qul Bayramınız mübarək”, “Bayram yoldaş ölümsüzdür”, “Bayrama nə oldu?” kimi şüarlar yazılıb.
Çexiyadakı Azərbaycan səfirliyinin qarşısına plakat asılıb.
İstanbulda “Bayramın qatili dövlətdir” şüarları yazılıb.
Bir qrup azərbaycanlı Berlindəki Türkiyə və Azərbaycan səfirlikləri önündə aksiya keçirib.
Nə baş verib: Türkiyədə yaşayan B. Məmmədov 2 maydan etibarən yoxa çıxıb. 5 mayda onun dənizdən ölü tapılması barədə dostlarına xəbər verilib. Mayın 9-da isə Bakıda dəfn edilib.
Rəsmi açıqlamada nə deyilir: Kadıköy Polis İdarəsinin yaydığı məlumata görə, Bayram Məmmədov dənizə düşən başmaqlarını götürmək üçün suya atlayıb və bir qədər çırpındıqdan sonra gözdən itib.
Bayramın ölümü niyə suallar yaradır: Polisin rəsmi açıqlaması ilə üst-üstə düşməyən məqamlar var. Polis B. Məmmədovun üzə bilmədiyini desə də, dostları əksinə yaxşı üzə bildiyini iddia edir. Yaxınları və dostları onun ölümünün ciddi araşdırılmasını tələb edir.
Bayramın ölümünə reaksiyalar: Bir qrup gənc ölümün ədalətli araşdırılması üçün #BayramaNeOldu , #VideoKayıtlarıİstiyoruz heştəqləri ilə “Twitter”da kampaniya başladıb.
Bayram Məmmədov kimdir: 2016-ci il mayın 9-dan 10-na keçən gecə Bayram Məmmədov Qiyas İbrahimovla birlikdə eks-prezident Heydər Əliyevin heykəlinə “Qul bayramınız mübarək” yazıb. Daha sonra onların hər ikisi narkotik ittihamı ilə həbs edilərək 10 il müddətinə azadlıqdan məhrum edilib. “Amnesty International” təşkilatı fəalları “vicdan məhbusu” elan edib. Hər iki fəal 2019-cu ildə əfv sərəncamı ilə azadlığa buraxılıb.
