17 mayda Gürcüstanın Dmanisi rayonunun mərkəzində azərbaycanlı sakinlər aksiya keçirib. Aksiyaya səbəb Gürcüstanda azərbaycanlılara qarşı kütləvi hücum hallarının baş verməsi olub.
Etirazçılar ötən gün kütləvi hücumun olduğu mağazanın yaxınlığında toplaşıblar. İştirakçılar bunun etnik zəmində baş verdiyini iddia edir.
Onlar bu cür halların Dmanisidə tez-tez baş verdiyini bildiriblər. Aksiya iştirakçıları aidiyyəti dövlət qurumlarını insidentlə bağlı müvafiq ölçü götürməyi və günahkarların cəzalandırılmasını tələb edirlər.
Nə baş verib: 16 mayda Gürcüstanın Dmanisi rayonunda kütləvi dava olub. İnsident azərbaycanlıya məxsus mağazada baş verib. Tərəflər mübahisə ediblər və daha sonra kütləvi şəkildə mağazaya hücum olub. Otuza yaxın şəxsin iştirak etdiyi dava zamanı bir neçə nəfərin ağır xəsarətlər aldığı bildirilir. Xəsarət alanlar arasında mağaza sahibinin qohumları da var. Qarşıdurmaya səbəb kimi marketdə nisyə pivə satılmaması olub.
Rəsmi açıqlama: “Dmanisidə baş vermiş insidentlə bağlı axtarış-əməliyyat və istintaq tədbirləri davam etdirilir”. Bunu Gürcüstanın daxili işlər nazirinin müavini Aleksandre Daraxvelidze jurnalistlərə açıqlamasında deyib. O, istintaqın zorakılıq maddəsi üzrə aparıldığını bildirib: “Hadisədə iştirak edən şəxslər müəyyən ediləcək və barələrində müvafiq tədbirlər görüləcək”. Nazir müavini insidentin bütün detallarının istintaq zamanı müəyyən ediləcəyini qeyd edib.
