“Ryanair” hava yolu şirkətinə məxsus təyyarə Afinadan Vilnüsə uçuş zamanı Minsk hava limanında məcburi eniş edib və NEXTA telegram kanalının keçmiş baş redaktoru Roman Protaseviç saxlanılıb. “Dojd TV” yazır ki, hava limanının mətbuat xidmətinin məlumatına görə, məcburi enişin səbəbi təyyarədə bomba olması barədə məlumat verilməsidir, amma bu, təsdiqlənməyib.
Uçuşdan öncə Roman Protaseviç izləndiyini hiss edib və bu barədə həmkarlarına məlumat verib.
Təyyarə necə eniş edib: Təyyarədə bomba olduğu barədə məlumat veriləndən sonra Belarus hava məkanında olan sərnişin təyyarəsi MiQ-19 təyyarələri tərəfindən müşayiət olunmağa başlayıb və bundan sonra məcburi eniş edib. Litva hökuməti və Vilnüs hava limanı isə təyyarə ilə baş verənləri anlamadıqlarını açıqlayıblar.
Təyyarə enəndən dərhal sonra isə sərnişinlər R. Protaseviçin həbs olunduğunu görüb.
Roman Protaseviçi nə gözləyir: Svetlana Tixanovskayanın məsləhətçisi Franak Vyaçorka “Dojd”a deyib ki, normal enişə təxmini 10 dəqiqə qalmış təyyarə Minskə geri qayıdıb və əslində Vilnüsə məsafəsi daha yaxın olub. F. Vyaçorka vurğulayıb ki, keçmiş baş redaktoru Belarusda ölüm hökmü gözləyir, o da NEXTA-nın təsisçisi Stepan Putilo kimi terrorçular siyahısında olub.
Belarus rəsmiləri nə deyir: Belarus Daxil İşlər Nazirliyi Protaseviçin Minsk hava limanında həbs olunmasını təsdiqləyib.
Svetlana Tixanovskaya nə deyir: Belarus prezident seçkilərində namizəd və seçilmiş prezident Svetlana Tixanovskaya jurnalistin azadlığa buraxdılmasını tələb edib və Belarusa sanksiya tətbiq edilməsi barədə çağırış edib. O həmçinin ICAO-dan (Beynəlxalq Mülki Aviasiya Təşkilatı) hadisənin araşdırılmasını tələb edib.
“Rejim jurnalist və fəal Roman Protaseviçi həbs etmək üçün Ryanairə məxsus təyyarəni Minskdə eniş etməyə məcbur edib. O, Belarusda ölüm hökmü ilə üz-üzədir. Biz onun dərhal azadlığa buraxılmasını. ICAO-nun hadisəni araşdırmasını və Belarusa sanksiya tətbiq edilməsini tələb edirik” – S.Tixanovskaya Twitter-də yazıb.
NEXTA nədir: NEXTA Telegram kanalının redaksiyası Varşavada yerləşir. Kanal Belarusda ötən ilin avqustunda baş tutan prezident seçkilərindən sonra baş tutan etiraz aksiyaları ilə bağlı mütəmadi məlumat yayıb. Roman Protaseviç ötən ilin sentyabrından etibarən kanaldakı fəaliyyətini dayandırıb.
