Bu gün Bakıda polislərin məişət zorakılığına məruz qalmış 23 yaşlı qadını iş yerinə gələrək qanunsuz olaraq apardığı iddia olunub.
Bu barədə vəkil Rövşanə Rəhimli “ Facebook” hesabından məlumat yayıb.
Məlumata görə, Rövşanə Rəhimlinin hüquqlarını müdafiə etdiyi və məişət zorakılığına məruz qalmış N.Vəliyevanı valideynlərinin şikayəti əsasında, Suraxanı Rayon 32-ci Polis Bölməsinin əməkdaşları iş yerinə gələrək aparıblar:
Qadının telefonu əlindən alınıb və valideynlərinə təhvil verilməsi ehtimalı var
məlumatda yazılıb.
Mikroskop Media məsələylə bağlı Suraxanı Rayon Polis İdarəsinin 32-ci Polis Bölməsiylə əlaqə yaradıb:
Görürsünüz heç soruşmuram ki, məsələ nədir. Mənim sizə məlumat vermək ixtiyarım yoxdur. İş rejimimi pozmayın, vaxtımı alırsınız. O xəbərin nə olduğunu mən bilirəm. Mən sizin nəyi soruşacağınızı bilirəm. Siz valideynləri axtarışa vermiş qız barəsində soruşacaqsınız. Bura gələn vəkil özünü təqdim eləmədi, müqaviləsini göstərmədi. Sizin isə ümumiyyətlə o barədə məlumat almaq ixtiyarınız yoxdur
polis bölməsindən deyilib.
