Azərbaycan Musiqi Mədəniyyəti Dövlət Muzeyi rəsmi “Facebook” səhifəsində Bülbülün doğum günü ilə bağlı postunda saxta foto paylaşıb. Bəstəkar Üzeyir Hacıbəyli ilə birlikdə bir neçə bəstəkar və musiqiçinin olduğu fotoda erməni opera müğənnisi Knarik Qriqoryanın olduğu hissə silinib. Fotonun əsl versiyasını Yusif İsmayıl adlı istifadəçi paylaşıb.
Muzey nə deyir: Azərbaycan Musiqi Mədəniyyəti Dövlət Muzeyinin direktor müavini Təranə Qurbanova fotonun qəsdən kəsildiyini təkzib edib. O, Mikroskop-a açıqlamasında bildirib ki, onlarda olan kolleksiyadakı foto K.Qriqoryanın olmadığı versiyadır.
Mən birinci dəfədir eşidirəm ki, erməninin şəklinin olmamasını bizə irad tutsunlar. İndi baxacağıq, əgər fotoşop variantıdırsa, biz onu siləcəyik.
Knarik Qriqoriyan kimdir: Erməni əsilli opera müğənnisi Azərbaycan Opera və Balet Teatrının solisti olub. O, Üzeyir Hacıbəylinin müəllifi olduğu “Koroğlu” operasında “Nigarın ariyası”nı da səsləndirib.
Həmin post artıq muzeyin Facebook səhifəsindən silinib.
