Bu gün Avro-2020 çempionatı çərçivəsində Almaniya ilə Macarıstan yığmalarının Allianz Arenada qarşılaşması olacaq. Macarıstan hökumətinin LGBTQI+ ilə bağlı qəbul etdiyi yeni qanuna etiraz olaraq Almaniya matçın keçiriləcəyi arenanı göy qurşağı rənglərində işıqlandırmaq üçün UEFA-ya müraciət edib.
Qurum bu müraciəti rədd etməsinin səbəbi kimi bunun siyasi məzmun daşıdığını bildirib.
Macarıstanın qəbul etdiyi qanun nədir: Hökumətin qəbul etdiyi yeni qanun 18 yaşa qədər şəxslər arasında homoseksuallıq və cinsiyyət dəyişdirməyi təşviq etdiyi hesab olunan məzmunun yayılmasını və reklamını qadağan edir. Eyni zamanda Macarıstan hökuməti eynicinsli nikahları tanımır və homoseksualların övladlığa uşaq götürməsini məhdudlaşdıran qanun qəbul edib.
UEFA nə təklif edir: Avropa Futbol Federasiyasının Rəyasət Heyətinin açıqlamasında stadionun göyqurşağı rənglərində işıqlandırılması üçün alternativ tarix təklif edilib. Təklif edilən tarix 28 iyun – Christopher Street Azadlıq Günü və ya 3-9 iyul Münihdəki “Christopher Street Günü” həftəsidir.
Həmçinin qurum Almaniya yığmasının qapıçısı Manuel Neuerin oyun zamanı göyqurşağı rənglərində kapitan sarğısını taxmasına icazə veriləcək.
Christopher Street Günü nədir: Bu, hər il Almaniya və İsveçrənin şəhərlərində 1969-cu ildə New Yorkda təşkil edilən Daş Divar Qiyamlarını anmaq üçün təşkil edilən illik LGBTQI+ mərasimidir. Bu, həmin ölkələrdə Fəxrin analoqudur.
Almaniya nə deyir: Münih bələdiyyə sədri Dieter Reiter UEFA-nın bu qərarını utancverici adlandırıb. O, UEFA-nın təklifindən imtina edib və oyun zamanı şəhərin görməli yerlərinin yox, məhz stadionun göyqurşağı rənglərində işıqlandırılacağını deyib.
UEFA-nın Münihdə LGBTQI + icmasına tolerantlıq, hörmət və həmrəylik mesajı göndərməyimizə icazə verməməsi utancvericidir. Allianz Arenanın fərqli bir gündə işıqlandırılması onun verəcəyi mesajla ziddiyyət təşkil edir. Bu gün Münih şəhəri olaraq həmrəyliyimizi və gender bərabərliyinə hörmətimizi Macarıstana və dünyaya göstərəcəyik.
Bunla bağlı yekun qərarı bələdiyyə məclisi verəcək.
Macarıstan nə deyir: Xarici İşlər naziri Peter Szijjarto siyasətlə idmanın qarışdırılmasını zərərli hesab edir və UEFA-nın qərarından məmnun olub.
UEFA rəhbərliyi Macarıstana qarşı siyasi bir təxribata qatılmamaq üçün doğru qərarı verib. Yaxşı ki, Avropa futbolunun liderləri arasında sağlam düşüncəli şəxslər var.
