Avropa İnsan Haqları Məhkəməsi (AİHM) 24 iyunda Azərbaycandan göndərilən 3 şikayət üzrə qərarını elan edib.
Elşən Əliyev Azərbaycana qarşı
Bu işdə tərəflər dostca anlaşıblar və buna əsasən hökumət ərizəçiyə 5000 avro təzminat və hüquqi xərclərə görə 1000 avro ödməlidir.
- Şikayət: Bu iş ərizəçinin ölkədən çıxışına yasaq qoyulması ilə bağlı idi. Ərizəçi iddia edirdi ki, onun həm hərəkət azadlığı hüququ, həm də şikayətinə baxılan zaman səmərəli hüquq müdafiə vasitələrinə malik olmaq hüququ pozulub.
Zülfüqar İbrahimov Azərbaycana qarşı
Bu işdə ərizəçinin vəkili AİHM-i hökumətin təklif etdiyi 3500 avro təzminatın əvəzində iddiadan imtina etdiyi barədə bilgiləndirib. Məhkəmə ərizənin baxılacaq işlərin sırasından çıxarılmasına qərar verib.
- Şikayət:Bu ərizə yerli məhkəmələrin ərizəçinin həbsi ilə bağlı yetərli və uyğun əsaslar təqdim etməməsi, onun girov qarşılığında sərbəst buraxılması tələbini rədd etməsi ilə bağlıdır. Ərizəçi bildirib ki, onun azadlıq və toxunulmazlıq hüququna müdaxilə olub.
Abbasov və başqaları Azərbaycana qarşı
Kommunikasiya zamanı hökumət AİHM-ə şikayətlərdəki iddiaları qəbul edib. Təklif edib ki, ərizəçilərə təzminat ödənilməsi qarşılığında şikayətlər baxılacaq işlərin siyahısından xaric edilsin. AİHM hökumətin təklifi barədə ərizəçiləri bilgiləndirib. Ərizəçilərdən yalnız E.Abbasov təklifdən imtina edib, digərləri məhkəməyə cavab verməyib.
Yekunda AİHM hökumətin təklifini qəbul edib və ərizələri baxılacaq işlər siyahısından çıxarıb. Qərara əsasən, hökumət 3 ay ərzində E.Abbasova 3850 , A.Nağıyevə 1800 , Ə.Bəkirova 1200 avro, Z.Əliyevaya 3850 avro təzminat ödəməlidir.
- Şikayət: Bu işdə ərizəçilər mülki iddialarla məhkəməyə müraciət ediblər. Ancaq məhkəmə iddialara ərizəçilərin iştirakı olmadan baxıb, məhkəmə prosesinin vaxtı və yeri barədə onları məlumatlandırmayıb. Ərizəçilər onlara münasibətdə ədalətli məhkəmə araşdırması hüququnun pozuntusuna yol verildiyini iddia ediblər.
