STS şirkəti və “Sahil-D Kompani” MMC-nin təsisçisi Sahib İbrahimovun cinayət işi üzrə ibtidai istintaqı yekunlaşıb.
Prokurorluq orqanlarından verilən məlumata görə, cinayət işi baxılması üçün Bakı Ağır Cinayətlər Məhkəməsinə göndərilib.
İş hakim Faiq Qəniyevin icraatına verilib. Məhkəmənin tarixi hələ açıqlanmayıb.
Sahib İbrahimov kimdir: Diasporla İş üzrə Dövlət Komitəsinin sabiq sədri Nazim İbrahimovun və iş adamı hacı İbrahim Nehrəmlinin qardaşıdır.
Nə ilə ittiham olunur: Sahib İbrahimov külli miqdarda pul mənimsəməkdə, vəzifə saxtakarlığında və dələduzluqda ittiham edilir. 17 aprel 2021-ci ildə S. İbrahimova Cinayət Məcəlləsinin külli miqdarda ziyan vurmaqla dələduzluq, ağır nəticələrə səbəb olmaqla vəzifə səlahiyyətlərindən sui-istifadə etmə və vəzifə saxtakarlığı maddələri ilə ittiham elan edilib. Bir müddət sonra isə onun barəsində həbs qətimkan tədbiri seçilib.
Nə baş verib: Sahib İbrahimovun digər vəzifəli şəxsləri ilə qabaqcadan əlbir olaraq qeyri-yaşayış sahələrinin satılması görüntüsünü yaratmaq məqsədi ilə saxta sənədlərin tərtib edib. Əmlak alıcılarından ayrı-ayrı vaxtlarda ümumilikdə 1 milyon 735 min manat məbləğində pul vəsaitini alıb.Bundan başqa, Sahib İbrahimov fərdi sahibkar kimi tikinti işlərinin aparılması üçün xərclərin ödənilməsi adı ilə kommersiya bankından 300 min manat məbləğində pul vəsaitini ələ keçirib şəxsi ehtiyaclarına sərf edərək təkrarən dələduzluq etməsinə əsaslı şübhələr müəyyən edilib.
