Şimali Kipr Türk Cümhuriyyətində rəsmi səfərdə olan Türkiyə prezidenti Rəcəb Tayyib Ərdoğan Türkiyənin Əfqanıstanın Kabil şəhərindəki hava limanının müdafiəsi barədə danışıb. Prezident bildirib ki, Ağ Ev Türkiyədən Həmid Karzai Hava Limanının müdafiəsini təşkil etməyi istəyib. O, bu müdafiənin təşkil olunması şərtlərini açıqlayıb:
- Diplomatik münasibətlərdə ABŞ Türkiyəni dəstəkləməlidir
- ABŞ Türkiyəyə maddi dəstək göstərməlidir
- ABŞ logistika imkanlarını səfərbər etməli və Türkiyəyə təhvil verməlidir
Türkiyə prezidenti həm də deyib ki, Əfqanıstanda gedən prosesi Talibanla müzakirə etmək vacibdir.
ABŞ-la olduğu kimi Türkiyə ilə də rahat danışıqlar aparılmalıdır. Çünki Türkiyənin onların inancı ilə əlaqədar bir problemi yoxdur. Ona görə hesab edirəm ki, bu məsələləri daha yaxşı müzakirə edə və razılığa gələ bilərik. Alternativlər də var və bunun üzərində işləməyə davam edirik.
Nə baş verib: Türkiyə prezidenti Rəcəb Tayyib Ərdoğan iyulun 19-dan Şimali Kiprdə rəsmi səfərdədir. O, 1974-cü il iyulun 20-də baş tutan “Kipr hərəkatı”nın 47-ci il dönümü ilə əlaqədar Şimali Kiprə səfər edib. Səfər çərçivəsində prezident parlamentdə çıxış edib və bu gün təşkil olunan tədbirə qatılıb.
