İyulun 28-i saat təxminən 00:50-də Ermənistan-Azərbaycan dövlət sərhədinin Kəlbəcər rayonu sahəsində atışmalar başlayıb.
Azərbaycan tərəfi nə deyir?
Azərbaycan Müdafiə Nazirliyi bildirib ki, Ermənistan silahlı qüvvələrinin bölmələri Azərbaycan Ordusunu atıcı silahlar və qumbaraatanlardan intensiv atəşə tutub.
Azərbaycan MN Ermənistan tərəfini dövlət sərhədinin delimitasiyası üzrə danışıqlara başlamağa çağırıb.
Azərbaycan Müdafiə Nazirliyinin yaydığı məlumatda göstərilir ki, Azərbaycan Rusiya tərəfinin atəşkəs təşəbbüsünü qəbul edib və saat 10:00-dan etibarən atəşkəs əldə edilib.
Azərbaycan tərəfi iddia edir ki, Ermənistan tərəfi atəşkəsi pozur:
Ermənistan tərəfi əlavə olaraq tank və 120 millimetrlik minaatanlardan istifadə etməklə vəziyyəti gərginləşdirməkdə və mövqelərimizi atəşə tutmaqda davam edir.
Azərbaycan MN
Yaralanan və ölən varmı: Azərbaycan tərəfindən iki hərbi qulluqçu Sadiq Əliyev və İmran İmranlı yaralanıb. Yaralılara ilkin tibbi yardım göstərilib.
Ermənistan tərəfi nə deyir?
Ermənistan Müdafiə Nazirliyi isə bildirib ki, döyüşləri Azərbaycan tərəfi başladıb və əməliyyatlar zamanı tərəflər atıcı silah və minaatanlardan istifadə edib.
Ermənistan və Azərbaycan tərəfləri arasında razılaşma Rusiya Federasiyasının sülhməramlı qüvvələrinin vasitəçiliyi ilə əldə edilib. Həmçinin qeyd edilib ki, atəşkəs razılaşmasına böyük ölçüdə hörmət edilir.
Ermənistan MN
Yaralanan və ölən varmı: Ermənistan tərəfində 3 ölü, 2 yaralı var.
Rusiya nə təklif edib : Rusiya hər iki tərəfə atəşkəs təşəbbüsünü irəli sürüb.
Nə baş verib: İyulun 1-dən 26-dək Azərbaycanla Ermənistan arasında atəşkəs 13 dəfə pozulub. Nəticədə Azərbaycan tərəfdən 3 nəfər yaralanıb, 1 nəfər həlak olub.
