Əri Füzuli Qarayev tərəfindən zorakılığa məruz qaldığına görə şikayətçi olan 23 yaşlı Sevinc Məhərrəmovanın öldürüldüyü bildirilir. Bu barədə məlumatı feminist fəal Gülnara Mehdiyeva canlı yayımda açıqlayıb. Qətli onun əri Füzuli Qarayevin törətdiyi ehtimal edilir.
S. Məhərrəmovanın 3 və 4 yaşlı iki uşağı var idi.
Nə baş verib: Bu ilin mart ayında Sevinc Məhərrəmova ailəsində zorakılığa məruz qaldığına görə, şikayətçi olub və feministlərə müraciət edib. Onun üzləşdiyi zorakılıq ictimailəşdirilib və fəallar da tədbir görülməsi barədə dəfələrlə polisə müraciət edib.
Polis nə edib: Sevinc Məhərrəmovanın əri tərəfindən ağacla döyülməsi barədə polisə məlumat verilsə də həmin şəxs saxlanılmayıb. Eyni zamanda F.Qarayev uşaqları S.Məhərrəmovadan gizlədib və Saatlı rayonunda yaşayan qohumlarının yanına aparıb. Fəallar polisdən uşaqların atalarından alınıb analarına təhvil verilməsini tələb etsə də, onlara bildirilib ki, ekspertiza rəyi çıxana və araşdırma yekunlaşana qədər uşaqlar atalarının himayəsində qalacaq.
Feminist fəallar deyir ki, Sevinc Məhərrəmova onlara uşaqlarından ayrı qala bilmədiyini deyərək geri qayıdıb.
“Məni bağışlayın, uşaqlarım ağlayır, getməliyəm, dözə bilmirəm onlarsız”.
Sevinc Məhərrəmova
Fəalların sözlərinə görə, F. Qarayev bundan əvvəl də Sevinc Məhərrəmova və uşaqlarını tüfənglə öldürməklə hədələyib, hər üçünü ağır şəkildə döyüb.
