Azərbaycanda iyulun 1-dən toyların keçirilməsinə icazə verilib, amma bəzi məhdudiyyətlərlə. Opertiv Qərargahdan bildirilib ki, nəzərdə tutulan qaydalara əməl edilmədiyi təqdirdə İnzibati Xətalar Məcəlləsinə əsasən fiziki şəxslər 200-400 AZN, vəzifəli şəxslər isə 4000-5000 AZN cərimə ediləcək.
İyul ayı ərzində toy və restoran sahibləri daxil olmaqla ümumilikdə 83 nəfər epidemiya əleyhinə rejimin qaydalarının pozulmasında təqsirli bilinib və cərimələnib.
Neçə restoran sahibi cərimələnib: Toyların keçirilməsinə icazə verilməsindən etibarən 17 restoranın sahibinin hər biri 4000 AZN cərimələnib. Restoranların siyahısı:
- Abşeron – 1 restoran
- Bərdə – 3 restoran
- Quba – “Çənlibel” restoranı
- Şamaxı – “Turist” və “Çinar” restoranları
- Kürdəmir – “Miraj” və “Nicat” şadlıq evləri
- Göyçay – “Vüqar” şadlıq evi
- Samux – “Çıraq Palace” şadlıq evi
- Qobustanda – “Qırxbulaq” şadlıq evi
- Cəlilabad – “Dostluq” və “Yamal” şadlıq evləri
- Xaçmaz – 1
- Göyçay – “Bizim bağ” şadlıq evi
- Cəlilabad –1
Restoran sahibləri ümumilikdə 68 min AZN məbləğində cərimə olunub.
Cərimələnən toy sahibləri: Toylar üçün nəzərdə tutulan məhdudiyyətlərə əməl etmədiyinə və epimoloji rejimin qaydalarını pozduğuna görə cərimələnən toy sahiblərinin sayı isə 51 nəfərdir. Onların hər biri 200-400 AZN məbləğində cərimə olunub. Siyahı:
- Bərdə – 1 toy sahibi
- Kürdəmir – 24 toy sahibi
- Göyçay –3 toy sahibi
- Salyan – 1 toy sahibi
- Abşeron – 5
- Samux – 2
- Saatlı – 2
- Qobustan – 7
- Ucar – 6
Cərimələrin ümumi məbləği 12 800 AZN olub.
Toya buraxılmayan və həbs edilənlər: İyul ayı ərzində toyda iştirak etmək istəyən 2 476 nəfər COVID-19 pasportu olmadığına görə şənliyə buraxılmayıb. 4 nəfər isə İnzibati Xətalar Məcəlləsinin 211-ci maddəsinə əsasən bir ayadək müddətə inzibati qaydada həbs edilib.
Hansı qaydalara əməl edilməlidir:
- Toylar 50-150 nəfərin iştirakı ilə təşkil oluna bilər.
- 18 yaşdan yuxarı şəxslər yalnız COVID-19 pasportu ilə toya buraxıla bilər.
- Mərasimdə xidmət göstərən heyət tibbi maska, əlcək və digər fərdi qoruyucu vasitələrdən istifadə etməlidir.
- Şənlik mərasimi keçirilən yerin sahibi tədbir barədə məlumatları icaze.e-gov.az portalına daxil edilməlidir.
- Toy sahibi və şənlik keçirilən məkanın sahibi arasında müştərək məsuliyyət barədə iltizamnamə imzalanmalıdır.
- 50 nəfərə qədər şəxslərin iştirakı olan mərasimə gəlmək üçün COVID-19 pasportu tələb edilmir.
- 150 nəfərdən artıq iştirakçısı olan şənliklər qadağandır.
Nə baş verib: Nazirlər Kabineti yanında Operativ Qərargah koronavirus səbəbindən 14 və 15 mart 2020-ci il tarixlərinə əvvəlcədən təyin olunan toy mərasimləri istisna olmaqla ölkə ərazisində bütün toy məclislərinin keçirilməsini qadağan edib. Məhdudiyyətlər 1 iyul 2021-ci ildən etibarən yumşaldılıb.
