1959-cu il təvəllüdlü Mədinə Rüstəmova deyir ki, peyvəndə qarşı “əks göstəriş sertifikatı” almaq üçün Yasamaldakı 19 saylı Şəhər Poliklinikasına gedib. Terapevt onu özəl klinikaya yönləndirib. O da allergik reaksiyasının olması ilə bağlı test verib və analizə 20 manat ödəyib. Testdə 6.7 dəfə normadan artıq allergik reaksiyası çıxsa da, poliklinika nəticəni qəbul etmir və sertfikatı ona vermir. M. Rüstəmova xəstəxanın bu qərarından narazıdır:
Xəstəxanadan mənə deyildi ki, heç kəsə sənəd verilməməsi ilə bağlı 20 gündür yuxarıdan təlimat gəlib. Səbəbini soruşduqda isə heç bir izahat vermirlər. Mənim analizimdə allergiyam olduğu ortaya çıxdı. Əgər mənə sənədimi verməyəcəkdilərsə, niyə məni testə yönləndirdilər? Gedib analizə 20 manat ödədim, ayda 130 manat pul alıram, onun da 20-si belə getdi. Bədənimdə səpkilər açıq şəkildə görünür. Hətta utandığımdan uzunqol paltar geyinmişəm ki, qıraqdan qollarım pis görünməsin.
Mikroskop Media Səhiyyə nazirliyi və Yasamal rayonu 19 nömrəli poliklinikaya ilə əlaqə saxlamağa çalışsa da bu, mümkün olmayıb.
Nə baş verib: Avqustun 9-dan etibarən vaksinlərə qarşı əks göstərişləri olan şəxslərə “Əks göstəriş sertifikat”ının verilməsinə başlanılıb. Bu barədə Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə məlumatında bildirilib.
