Ermənistanın Baş naziri Nikol Paşinyan çərşənbə günü hökumət iclasında deyib ki, bölgədə sülh və sabitlik Ermənistan hakimiyyətinin uzunmüddətli strategiyasıdır.
Onun sözlərinə görə, Türkiyə prezidenti açıq şəkildə Ermənistanla münasibətlərə toxunub:
Biz bu bəyanatlarda Ermənistan-Türkiyə münasibətlərinin normallaşması, avtomobil və dəmir yolu əlaqələrinin bərpasını müzakirə etmək üçün fürsət görürük. Daha geniş kontekst əldə edilə biləcək belə bir danışıqlara hazırıq.
Baş nazirin sözlərinə görə, məsələ bölgənin şərqlə qərbi, şimalla cənubu birləşdirəcək qovşağa çevrilməsindən gedir.
Paşinyan onu da deyib ki, Rusiya bu prosesə kömək etməyə hazır olduğunu bildirib. O, həmçinin bildirib ki, xüsusilə Fransa və ABŞ da bu prosesdə maraqlıdır.
Nə baş verib: Daha əvvəl Türkiyə Prezidenti Rəcəb Tayyib Ərdoğan Ankaranın barışıq xarakterli bəyanatları fonunda Ermənistanla münasibətləri tədricən normallaşdırmağa hazır olduğunu bildirib.
