Sentyabrın 14-ü səhər saatlarında Təhsil Nazirliyinin inzibati binasının önündə təkadamlıq etiraz aksiyası keçirilib. İşsizlikdən gileylənən şikayətçi Arzu Quliyeva müəllimlərin işə qəbulu üzrə imtahanların ləğv edilməsini tələb edib. Buna səbəb kimi isə imtahaların ədalətsiz keçirildiyini deyib.
“MİQ imtahanı ləğv edilsin” şüarı ilə etiraz edən A.Quliyeva müəllim namizədidir. O, 2015-ci ildən bəri müəllimlərin işə qəbulu (MİQ) üzrə imtahanlarında iştirak etsə də, iş tapa bilmir. Bu il isə etiraz olaraq imtahanda iştirak etməyib.
O deyir ki, Azərbaycan dili və ədəbiyyat fənləri üzrə 40 sualdan 35 –nə düzgün cavab verməsinə baxmayaraq kurrikulum sualları proqramdan kənar salınır:
60 mindən çox müəllim ərizə qəbuluna sənəd verdi. Lakin vakansiya üçün cəmi 5-6 min yer ayrılır. Hələ o da şəffaf şəkildə bilinmir ki, o 6 min müəllim həqiqətən işlə təmin olunur, ya yox. İşlə bağlı iki ildir ki, Təhsil Nazirliyinin İnsan Resursları Mərkəzinə müraciət edirəm. Mərkəzdən deyirlər ki, hansı rayondasınızsa, o rayonun təhsil şöbəsinə gedin. Mən özüm vakansiya yerlərini axtarıb tapacamsa, həmin mərkəz nə işə yarayır?!
etirazçı
Daha sonra polislər və nazirliyin nümayəndələri etirazçının şüarını əlindən alıb.
Təhsil Nazirliyinin nümayəndəsi onu qəbul etsə də, qurumdan etirazçıya heç bir dəyişiklik olmayacağını bildiriblər.
Nə baş verib: Təhsil nazirliyinin 2021-2022-ci tədris ili üzrə müəllimlərin işə qəbulu üzrə keçirdiyi müsabiqədə 62 242 nəfər namizədliyini irəli sürüb. 60 627 elektron ərizəsini təsdiq edib, elektron ərizəsi çap olunan 59 153 namizəd test imtahanı prosesində iştirak etmək imkanı qazanıb.Yekunda isə müsabiqədə 46 930 nəfər iştirak edib.
