Ləğv edilmiş Milli Təhlükəsizlik Nazirliyinin(MTN) İstintaq Baş İdarəsinin sabiq rəisi Mövlam Şixəliyev və digər vəzifəli şəxsləri tərəfindən qanunsuz əməllərə yol verilməsi faktları ilə bağlı istintaq sentyabrın 15-də yekunlaşdırılıb.
MTN-nin Hərbi əks-Kəşfiyyat Baş İdarəsinin sabiq rəisi Nizami Şirinov bu ilin aprelində başqa bir MTN generalı, uzun müddət nazirliyin İstintaq İdarəsinə rəhbərlik etmiş Mövlam Şixəliyevlə birlikdə həbs olunub.
Baş prokurorluqdan verilən məlumata görə, M.Şixəliyev İstintaq Baş İdarəsinin rəisi vəzifəsində çalışdığı 6 il ərzində qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov ilə birgə qanunsuz əməllər törətməkdə şübhəli bilinir.
17 milyon manatlıq mənimsəmə
Mövlam Şixəliyevin sözügedən digər vəzifəli şəxslərlə birgə ümumilikdə 14 milyon 292 min manat məbləğində pul vəsaitini rüşvət qismində, 5 milyon 77 min manat məbləğində özgə əmlakını hədə-qorxu ilə tələb edib alması, həmçinin səlahiyyət həddini aşması və sübutları saxtalaşdırması kimi maddələrlə ittham olunur.
Cinayət Məcəlləsinin hansı maddələri ilə ittiham verilib: M. Şixəliyevə külli miqdarda əmlak əldə etmək məqsədilə mütəşəkkil dəstə tərəfindən hədə qorxu ilə tələb etmə, sübutları saxtalaşdırma, qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma və digər maddələrilə ittiham verilib. Vüsal Ələkbərov, Yasin Məmmədov və Sahib Ələkbərova isə Cinayət Məcəlləsinin mütəşəkkil dəstə tərəfindən rüşvət alma, vəzifə səlahiyyətlərindən sui-istifadə və ya vəzifə səlahiyyətlərini aşma və başqa maddələrilə ittiham verilib. İstintaq dövrü üçün onların barəsində başqa yerə getməməyə dair iltizam qətimkan tədbiri seçilib.
