Avropa Şurası Nazirlər Komitəsi Avropa Məhkəməsinin Azərbaycanda Vəkillər Kollegiyasından uzaqlaşdırlan hüquqşunasların şikayətləri üzrə qərarlarının icra durumunu müzakirə edib.
Qərar “Namazov işi” qrupuna daxil olan qərarların icra durumunun müzakirəsinin yekunu olaraq vəkillikdən uzaqlaşdırılmış 3 nəfər – Xalid Bağırov, Elçin Namazov və Aslan İsmayılovun kollegiyaya bərpa edilməli olduğu barədə qərar qəbul edilib.
“Namazov işi” qrupu nədir: Bu qrup çərçivəsində Avropa İnsan Hüquqları Məhkəməsinin Azərbaycanla bağlı 3 qərarının (Elçin Namazov, Xalid Bağırov, Aslan İsmayılov Azərbaycana qarşı qərarları) icrasına nəzarət edilir. Vəkillər Kollegiyası ilə bağlı olan hər 3 qərarda məhkəmə şikayət edən ərizəçilərin xeyrinə qərar verib.
Avropa Şurası Nazirlər Komitəsi nə tələb edir: Komitənin qərarında Azərbaycan hökumətindən həmin 3 vəkillə bağlı işlərə yenidən baxılıb qərar verilməsi tələb edilir. Digər tələblər:
- Hökumət Vəkillər Kollegiyasının diqqətini AİHM qərarlarının icrasına yönəltməli və şikayətçilər əvvəlki vəziyyətlərinə qaytarılmalıdır.
- Hökumət vəkillikdən uzaqlaşdırmanın spesifik əsaslarını daxili qanunvericilikdə göstərilməlidir
- Vəkilləri lüzumsuz intizam icraatlarından qoruyan mexanizmlər yaradıb, tətbiq etməlidir.
- Vəkillərə qarşı intizam icraatları ilə bağlı məhkəmə təcrübəsi yaxşılaşdırlmalıdır
Komitə “Namazov işi” qrupuna daxil olan qərarların icra durumunu gələn il yenidən müzakirəyə çıxaracaq.
