Sentyabrın 29-da Baş Prokurorluqdan verilən məlumata görə, Yevlax rayonun Aran bələdiyyəsinin vəzifəli şəxsləri barədə pul vəsaitlərinin mənimsənilməsinə görə cinayət işi başlanıb.
Yeyinti necə baş tutub: Prokurorluğun məlumatına görə, araşdırmalarda bələdiyyənin vəzifəli şəxsləri müxtəlif vasitələrlə pul mənimsəyib:
- 2013-2018-ci illər üzrə poçt və bank filiallarından nağd qaydada alınan pul vəsaitlərindən 63 min AZN təsərrüfat xərcləri kimi sənədləşdirilmədən və təsdiqedici sənədlər olmadan xərc kimi silinib,
- Bələdiynin müxtəlif hüquqi şəxslərə satdığı torpaq sahələrinə görə 109 min manat bələdiyyənin hesabına köçürülməyib.
Rəsmi məlumatda deyilir ki, müxtəlif korrupsiya sxemlərindən istifadə edilməklə mənimsənilən vəsaitin ümumi həcmi 259 min manatdır.
Hansı maddə ilə cinayət işi açılıb: Faktla bağlı Yevlax Rayon Prokurorluğunda Cinayət Məcəlləsinin “Külli miqdarda mənimsəmə və ya israf etmə” maddəsi ilə cinayət işi başlanıb. Hazırda cinayət işi üzrə bütün təqsirli şəxslərin müəyyən edilməsi istiqamətində tədbirlər davam etdirilir.
