Gürcüstanın keçmiş prezidenti Mixeil Saakaşvili bu gün Gürcüstanda saxlanılıb. OC Media yazır ki, bu barədə məlumatı bu gün keçirilən mətbuat konfransında Baş nazir İrakli Qaribaşvili verib. O bildirib ki, hüquq-mühafizə orqanları Milli Birlik Hərəkatının fəxri lideri M.Saakaşvilini həbs edib.
Baş nazir əlavə edib ki, saxlanılma peşəkar əməliyyat nəticəsində baş tutub:
Mən Daxili İşlər Nazirliyi, Dövlət Təhlükəsizlik Xidməti rəhbərliklərinə öz təşəkkürümü bildirirəm.
Qaribaşvilinin sözlərinə görə, Saakaşvili barədə hüquq-mühafizə orqanlarında onun Ukraynanı tərk etdiyi andan etibarən Gürcüstana daxil olana qədər məlumat olub. Keçmiş prezidentin ölkənin hansı şəhərində həbs edildiyi barədə məlumat verilməyib.
Nə baş verib: Bu gün səhər saatlarında Gürcüstanın keçmiş prezidenti Mixael Saakaşvili “Facebook” hesabında “Sabahın xeyir, Gürcüstan!” yazaraq ölkəyə qayıtdığını elan edib. Daha sonra isə Batumidə olduğunu təsdiqləyən video paylaşıb. Gün ərzində Daxili İşlər Nazirliyinin xüsusi təyinatlı qüvvələrinin Batumiyə yeridildiyi barədə görüntülər yayılmışdı.
Nədə ittiham olunur: Mixeil Saakaşvili vəzifə səlahiyyətlərindən sui-istifadə etməkdə təqsirli bilinərək qiyabi olaraq məhkum edilib. O, siyasi rəqibi Valeri Qelaşviliyə hücum əmri və 2006-cı ildə Sandro Qirgvlianinin qətlində təqsirli bilinən hüquq-mühafizə orqanı əməkdaşlarının əfv ediləcəyi barədə qeyri-qanuni vəd verməkdə ittiham olunur.
Ölkəyə necə gəlib: 2013-cü ildə Gürcüstanı tərk edən M.Saakaşvili indiyə qədər dəfələrlə ölkəyə qayldacağı barədə vəd verib. O, sonuncu dəfə sentyabrın 27-də bəyan edib ki, oktyabrın 2-də Gürcüstanda keçiriləcək bələdiyyə seçkilərindən əvvəl ölkədə olacaq. Bundan sonra prezident onun həftənin şənbə günü ölkədə olacağını göstərən bileti paylaşıb. Buna baxmayaraq keçmiş prezident cümə günü Batumi şəhərindən video paylaşıb.
Onun Gürcüstan sərhədini necə keçdiyi hələ də məlum deyil.
