Ermənistanın keçmiş prezidenti Serj Sarkisyanın Almaniyanın kurort şəhəri Baden-Badenə 15-dən çox səfəri ilə bağlı Ermənistanın Xüsusi İstintaq Xidməti cinayət işi başladıb. OC Media yazır ki, oktyabrın 11-dən etibarən başlayan cinayət işində keçmiş prezident “vəzifə səlahiyyətlərindən sui-istifadə etmək”də ittiham olunur.
İstintaqın başlamasına əsas Yerevanda fəaliyyət göstərən, araşdırma və fakt yoxlama təşkilatı olan “Fakt Araşdırma Platforması”nda (FIP) nəşr olunan araşdırma materialıdır. Həmin araşdırmada deyilir ki, Sarkisyan ölkəyə rəhbərlik etdiyi dövrdə Almaniyanın kurort şəhərinə 15 dəfədən çox səfər edib.
Platformanın dərc etdiyi araşdırmada Sarkisyanın Baden-Badenə sadəcə istirahət üçün deyil, xarici ölkələrə rəsmi səfərləri zamanı qısa fasilə üçün də gəldiyi sənədlərlə sübut edilib. FIP Sarkisyanın uçuşları ilə bağlı məlumatları Ermənistanın Mülki Aviasiya Komitəsindən əldə etdiyini açıqlayıb.
Keçmiş prezidentin Baden-Badenə həm də kazinoya baş çəkmək üçün getdiyi barədə də iddialar var. Növbədənkənar parlament seçkiləri ərəfəsində Sarkisyan Almaniya səfərini etiraf etsə də, ora qumar oynamaq üçün getdiyi barədə iddianı təkzib edib.
“Baden-Baden mədəniyyətin inciləri ilə tanış olmağa imkan verən istirahət və mədəniyyət şəhəridir” – o qeyd edib.
Vətəndaş Müqaviləsi Partiyasından olan millət vəkili və Ermənistanın ən varlı şəxslərindən hesab olunan Xaçatur Sukiasyan (“Grzo” təxəllüsü ilə məşhurdur) Sarkisyanı “Baden-Baden kazinosunda 100 milyon dollardan çox pul itirməkdə” ittiham edib.
Serj Sarkisyan hakimiyyətdə olduğu dövrdəki fəaliyyətinə görə başqa ittihamlarla da üzləşib. Ona qarşı irəli sürülən digər ittiham isə 2013-cü ildə Ermənistan hökumətindən təxminən 490 milyon dram (1 milyon dollar) pulu mənimsəməsi ilə bağlıdır.
