Oktyabrın 13-də Azərbaycan Xalq Cəbhəsi Partiyasının fəalı Niyaməddin Əhmədov 21 gündür çəkən aclıq aksiyanı dayandırıb. Onun vəkil Zibeydə Sadıqovanın Turana verdiyi məlumata görə, N. Əhmədov bu addımı yaxınlarının və AXCP rəhbərliyinin israrlı istəklərindən sonra atıb.
Aclıq aksiyasını niyə başladıb: Bu il sentyabrın 22-də Bakı Ağır Cinayətlər Məhkəməsində prokuror siyasi fəala 15 il həbs cəzası istəyib. Partiyadan verilən məlumata görə, N. Əhmədov həbsini qanunsuz hesab edib və buna etiraz olaraq aclıq aksiyası keçirib.
Niyaməddin Əhmədov kimdir: O, AXCP partiyasının sədri Əli Kərimlinin ictimai əsaslarla mühafizəçisi olub.
16 aprel 2020-ci ildə karantin rejimini pozduğu və polisə müqavimət göstərdiyi əsas gətirilərək 30 sutka həbs edilib.
Fəala qarşı daha sonra Cinayət Məcəlləsinin 214-1 (terroru maliyyələşdirmə) maddəsi ilə ittiham irəli sürülüb. N.Əhmədov Almaniyada mühacirətdə olan bloqqer Qabil Məmmədovla əlaqədə olmaqda və Azərbaycanda terror törətmək üçün ondan maddi dəstək almaqda ittiham olunub.
AXCP partiyasının verdiyi məlumata görə, N.Əhmədov həbsdə olarkən ondan partiya liderinin əleyhinə ifadə almaq üçün işgəncələrə məruz qoyublar.
Oktyabrın 8-də Bakı Ağır Cinayətlər Məhkəməsi onu 13 il müddətinə azadlıqdan məhrum edib.
