Azərbaycanla Ermənistan arasındakı 44 günlük müharibədən sonra Bakıda yaradılan Hərbi Qənimətlər Parkından Ermənistan Silahlı Qüvvələri hərbçilərini əks etdirən maketlər və müharibədə ələ keçirilən dəbilqələr yığışdırılıb.
Mikroskop Media xəbər verir ki, bu barədə Ermənistan mediası da məlumat yayıb. Həmin məlumata görə, maket və dəbilqələrin yığışdırılması Ermənistan tərəfinin tələbi ilə baş tutub. 1lurer.am yazıb ki, Ermənistanın tələbindən sonra Azərbaycan tərəfi Beynəlxalq Ədalət Məhkəməsində bəyan edib ki, maket və dəbilqələr parkdan yığışdırılıb.
Ermənistan isə məhkəməyə həmin parkın ümumiyyətlə bağlanması üçün müraciət etmişdi.
Mikroskop Medianın jurnalistinə Hərbi Qənimətlər Parkının əməkdaşları bildirib ki, maketlər şamdan düzəldilib və ziyarətçilər onlara toxunduğu üçün hazırda təmirə göndəriliblər. Park əməkdaşları dəbilqələrin də təmirə göndərildiyini və onların nə vaxt geri qaytarılacağının məlum olmadığını deyib.
