Dələduzluqda təqsirli bilinən, 2000-2007-ci illərdə Bakı Apellyasiya Məhkəməsinin, 2007-2008-ci illərdə isə Suraxanı Rayon Məhkəməsinin hakimi olmuş Lətif Nəbiyev məhkəmə zalında həbs olunub. Oktyabrın 20-də Bakı Ağır Cinayətlər Məhkəməsində hakim İlham Mahmudovun sədrliyi ilə keçirilən prosesdə hökm oxunub.
Məhkəmədə nə qərar verilib: Hökmə əsasən, L.Nəbiyev külli miqdarda dələduzluqda təqsirli bilinib və 8 il azadlıqdan məhrum edilib. Həmçinin məhkəmə qərarında bildirilib ki, L.Nəbiyev vurduğu ziyanı da ödəməlidir.
Hansı maddə ilə ittiham olunur: O, iki nəfəri aldadaraq onların 300 min dollardan artıq pulunu ələ keçirməkdə təqsirli bilinir. L.Nəbiyev birgə biznes qurmaq adıyla Rüstəm Abdullayevdən 59 min 700 dollar alıb. Keçmiş hakim qohumu olan Azad İbrahimovdan isə onun üçün Bilgəhdə dəniz kənarında və Xətai rayonunda torpaq sahələri almaq adıyla 247 min 500 dollar pul alıb. Ona Cinayət Məcəlləsinin 178.3.2-ci “Dələduzluq, külli miqdarda ziyan vurmaqda “maddəsi ilə ittiham verilib.
