Gürcüstanın şimalında, Şovi kurortunda baş verən torpaq sürüşməsinə görə yerli hakimiyyət tənqid hədəfindədir. OC media yazır ki, tənqidçilər sürüşmənin fəsadlarını minimuma endirmək üçün onun proqnozlaşdırıla biləcəyini hesab edir. Onlar deyir ki, ərazidəki sakinlər sürüşmə ilə bağlı məlumatlandırıla bilərdi.
Nə baş verib?
Avqustun 3-ü “Sunset Shovi” oteli ərazisində torpaq sürüşməsi olub və rəsmi məlumata görə, hadisə nəticəsində 25 nəfər həlak olub, 8 nəfər isə itkin düşüb.
Hazırda axtarış-xilasetmə işlərinə ordu da qoşulub.
Ermənistan və Azərbaycan fəlakətdən dərhal sonra yardım təklif etsə də Gürcüstanın Baş naziri İrakli Qaribaşvili bundan imtina edib.
Sürüşməyə səbəb nə olub?
Gürcüstanın Milli Ətraf Mühit Agentliyinin dərc etdiyi ilkin təhlildə deyilir ki, torpaq sürüşməsinə bir neçə amil, o cümlədən yaxınlıqdakı Buba və Tiflis buzlaqlarının “intensiv” əriməsi, yer eroziyaları səbəb olub.
Hökumət niyə günahlandırılır?
Agentlik sürüşmədən bir neçə gün əvvəl Buba çayındakı tıxanma ilə bağlı fərziyyələri təkzib edib.
İlya Dövlət Universitetindəki Yer Elmləri İnstitutunun Coğrafiya departamentinin rəhbəri Laşa Suxişvili “Netgazeti”yə açıqlamasında Milli Ətraf Mühit Agentliyinin sürüşmənin saatda 70 km sürətlə baş verdiyi iddiasına şübhəli yanaşdığını deyib. Suxişvili hesab edib ki, sakinlərə bu barədə xəbərdarlıq edilə bilərdi.
Hökumətin tənqid olunmasının digər səbəbi də fəlakətlə bağlı ön hazırlığın olmaması və operativ ilkin reaksiyanın verilməməsidir. Sürüşmə nəticəsində sağ qalanlar deyib ki, onlara nə xəbərdarlıq edilib, nə də evakuasiya ilə bağlı göstəriş verilib.
Sakinlərin açıqlaması hökumətin aşkarlama mexanizminin olmamasına görə, daha çox tənqid olunması ilə nəticələnib.
Hökumət nə deyir?
Hakim “Gürcü Arzusu” partiyası və Baş nazir İrakli Qaribaşvili açıqlama yayıb ki, hökumətin baş verən fəlakətə reaksiyası vaxtında və adekvat olub.
Hadisədən 5 gün sonra hökumət elan edib ki, onlar dərhal mümkün səhlənkarlıq və tikinti pozuntuları ehtimallarının araşdırılmasına başlayıb.
Gürcüstanın 2017-2022-ci il üzrə “Fəlakət Riskinin Azaldılması üzrə Milli Strategiya”sında erkən xəbərdarlıq sisteminin yaradılması prioritet kimi qeyd olunub. Eyni zamanda 2021-ci ildə Milli Ətraf Mühit Agentliyi Şovini təbii fəlakət riski yüksək olan ərazilər sırasına daxil edib.
Hökumət nəyə söz vermişdi?
Hakim “Gürcü Arzusu” partiyasının 2021-ci ildəki seçki platformasında qeyd olunub ki, təbii fəlakət riski yüksək olan ərazilərdə 150-ə yaxın avtomatik monitorinq stansiyaları və xəbərdarlıq sistemləri yaradılacaq.
“Erkən xəbərdarlıq SMS sistemi riskli ərazilərdə olan abunələri olduqları ərazidəki təhlükə ilə bağlı xəbərdar edəcək” – hökumət proqramında deyilir.
Eyni şəkildə hakim partiya Svanetidəki Nenskra çayının daşmasından sonra, 2018-ci ildə söz vermişdi ki, 2-3 il ərzində bütün Gürcüstanda xəbərdarlıq sistemi qurulacaq.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
