Seçkilərin Monitorinqi və Demokratiyanın Tədrisi (SMDT) Mərkəzinin rəhbəri, seçki mütəxəssisi Anar Məmmədli saxlanılıb və ona qarşı qaçaqmalçılıq ittihamı irəli sürülüb.
29 apreldə saxlanılan Anar Məmmədlinin evində axtarış aparılıb. Yaxınlarının və vəkilin axtarışda iştirakına imkan verilməyib.
Evdəki axtarışın nəticələri ilə bağlı nə onun vəkili, nə də ailə üzvləri məlumatlıdır.
Vəkil Elçin Sadıqova deyilib ki, eyni iş üzrə başqa şəxsi müdafiə etdiyi üçün vəkili axtarışda iştirakına icazə verilməyəcək.
Bu gün məlum olub ki, Anar Məmmədli “Abzas işi” üzrə saxlanılıb və ona Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham elan edilib.
“Abzas işi” nədir?
Keçən ilin noyabrından etibarən “Abzas Media”ya qarşı hücumlar başlayıb. Saytın direktoru, direktor müavini, baş redaktoru və 3 jurnalist də daxil olmaqla ümumilikdə 6 nəfər əməkdaşı saxlanılıb.
Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb, barələrində həbs qətimkan tədbiri seçilib.
Saxlanılanları 8 ilədək həbs cəzası gözləyir. Onlar ittihamı qəbul etmir və jurnalistika fəaliyyətlərinə görə saxlanıldıqlarını deyirlər.
