Fransanın Paris şəhər bələdiyyəsinin və bir neçə təşkilatın birgə göndərdiyi 10 yük maşınından ibarət humanitar yardım karvanının Laçın sərhəd-buraxılış məntəqəsindən keçməsinə icazə verilməyib.
Söhbət Xankəndiyə göndərilmək üçün yola çıxan humanitar yardım karvanından gedir.
Yük maşınlarını şəxsən Parisin meri Ann Hidalqo müşayiət edib. İdalqo baş verənlərlə bağlı tweet atıb.
Biz burada Laçın dəhlizində heç bir humanitar yardımın Arsaxa daxil ola bilməyəcəyinə şahidlik etdik. Bu, insan hüquqlarının pozuntusudur. Humanitar yardım dolu 10 yük maşınımız buraxılmadı. Humanitar böhran davam edir.
Ann İdalqo
Makronla Əliyevin telefon danışığı
29 avqustda Fransa prezidenti Emmanuel Makronla Azərbaycan prezidenti İlham Əliyev arasında telefon zəngi olub. Telefon danışığında Ağdam-Xankəndi və Laçın-Xankəndi yollarının açılması məsələsi müzakirə olunub.
İlham Əliyev deyib ki, Ağdam-Xankəndi yolu açıldıqdan sonra Azərbaycanın gömrük və sərhəd rejimi qaydalarına riayət etməklə Laçın-Xankəndi yolundan istifadə edilə bilər.
Emmanuel Makron isə vəziyyətin sabitləşdirilməsi və mövcud gərginliyin aradan qaldırılması üçün Fransanın da öz töhfəsini verməyə hazır olduğunu bildirib.
Ermənistan, “Dağlıq Qarabağ” və Aİ nə düşünür?
Həm Ermənistan, həm də “Dağlıq Qarabağ Respublikası” Azərbaycandan göndərilən humanitar yardımı rədd edir.
Bəzi Qərb ölkələri və Avropa İttifaqı Azərbaycanın təklifini müsbət qarşılasa da, Aİ-nin ali komissarı Josep Borrell Ağdam-Xankəndi yolunun Laçın dəhlizinə “alternativ” ola bilməyəcəyini açıqlayıb.
XİN-lər nə deyir?
Fransanın Xarici İşlər naziri Katrin Kolona avqustun 29-da Parisdə keçirilən səfirlər konfransındakı çıxışı zamanı Qarabağdakı vəziyyətdən danışıb və Bakının Qarabağ ermənilərini kütləvi mühacirətə təhrik etdiyini deyib:
Ermənilərin Dağlıq Qarabağdan kütləvi mühacirətinə sövq etmək məqsədi daşıyan sıxışdırılma strategiyası Beynəlxalq Ədalət Məhkəməsinin qərar verdiyi kimi qeyri-qanuni, həm də qeyri-əxlaqidir.
Katrin Kolona
Azərbaycan Xarici İşlər Nazirliyinin sözcüsü Ayxan Hacızadə isə fransalı nazirin açıqlamasının qəbuledilməz olduğunu deyib və Fransanı təhrikçi və təxrubatçı bəyanatlar səsləndirməkdə ittiham edib.
Azərbaycan Respublikası milli qanunvericiliyi çərçivəsində Qarabağ bölgəsində yaşayan erməni sakinlərin ölkəmizin siyasi, sosial və iqtisadi sferalarına reinteqrasiyası istiqamətində səy göstərir və bu səylərə qarşı maneçilik törədilməsi, o cümlədən guya erməni sakinlərin bölgədən qovulması istiqamətində siyasət həyata keçirildiyi barədə iddialar səsləndirilməsi tamamilə yanlışdır. Bir daha Fransa tərəfini bu kimi təhrikçi və təxribatçı bəyanatlara son qoymağa çağırırıq.
Ayxan Hacızadə
Avqustun 31-də isə Fransanın Azərbaycandakı səfiri Ann Buayon Xarici İşlər Nazirliyinə çağırılıb. Səfirlə görüş zamanı həm humanitar yük məsələsi, həm də Fransa rəsmilərinin vəziyyətlə bağlı açıqlamaları ilə bağlı XİN-in etiraz notası ona təqdim olunub:
“Ermənistanın yalan və manipulyasiya kampaniyasına alət olan bu təxribatçı əməllər bölgədə vəziyyətin gərginləşməsinə yönələn və Fransa tərəfindən Ermənistanı revanşist mövqeyini davam etdirməyə həvəsləndirən və son günlər daha da intensivləşən addımların növbəti nümunəsidir” – deyə görüşdə qeyd olunub.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
