Ermənistanla Rusiya arasında onsuz da gərgin olan münasibətlər Ermənistanın atdığı son addımlardan sonra bir az da gərginləşib.
Söhbət hansı addımlardan gedir?
- Ermənistanın Ukraynaya ilk humanitar yardımını göndərməsi
- Kollektiv Təhlükəsizlik Müqaviləsi Təşkilatındakı (KTMT) nümayəndəsini geri çağırması
- ABŞ-la birgə hərbi təlimlər keçirəcəyi xəbəri
Ukraynaya yardım
2022-ci ildə Rusiyanın Ukraynaya təcavüzü başlayandan bəri ilk dəfə olaraq Ermənistan hökuməti Ukraynaya humanitar yardım göndərib. Yardımın çatdırılmasına Ermənistanın Baş naziri Nikol Paşinyanın həyat yoldaşı Anna Akopyan kömək edib.
6 sentyabrda Ukrayna prezidentinin həyat yoldaşı Olena Zelenskayanın təşkilatçılığı ilə Kiyevdə “Birinci Xanımlar və Cənablar” sammiti baş tutub. Nikol Paşinyanın həyat yoldaşı Anna Akopyan da həmin sammitdə iştirak edib.
KTMT ilə problemlər
2022-ci ilin 12-14 sentyabrında Azərbaycanla Ermənistan sərhədində baş verən toqquşmalardan sonra Ermənistanın KTMT ilə ciddi fikir ayrılığı yaranıb.
Ermənistan, öz ərazisinə hücum edildiyini əsas gətirərək KTMT-nin müdaxiləsinə nail olmağa çalışsa da bu baş vermədi. Bununla da təşkilat barədə tez-tez səsləndirilən tənqidlər Ermənistanın KTMT-dəki nümayəndəsini geri çağırmaqla nəticələndi.
ABŞ-la birgə hərbi təlim
Ermənistanın KTMT-dəki nümayəndəsini geri çağırmasından bir gün sonra, 6 sentyabrda Müdafiə Nazirliyi sentyabrın 11-dən 20-dək Ermənistan Silahlı Qüvvələrinin sülhməramlı missiyalara hazırlanmasına kömək etmək üçün ABŞ-la birgə hərbi təlimlərin keçiriləcəyini açıqlayıb.
Kremlin sözçüsü Dmitri Peskov xəbəri “narahatlığa səbəb” adlandırıb, xüsusən də “indiki vəziyyətdə”.
Belə təlimlərin keçirilməsi vəziyyətin sabitləşməsinə töhfə vermir.
Dmitri Peskov
İki ölkə arasındakı söz davası
2 sentyabrda Nikol Paşinyan Rusiya sülhməramlılarını Dağlıq Qarabağın blokadaya alınmasına imkan verməkdə ittiham edib. Deyib ki, “missiyalarını yerinə yetirə bilmədilər”. Paşinyan qeyd edib ki, bir tərəfdaşdan asılı olmaq “strateji səhv oldu”.
İtaliyanın “La Repubblica” qəzetinə açıqlama verən Paşinyan izah edib ki, Ermənistanın təhlükəsizlik arxitekturası “99,999% Rusiya ilə bağlıdır” və Rusiyanın Ukraynaya genişmiqyaslı müdaxiləsindən sonra ölkə hərbi dəstək və ya sursat tədarükündən məhrum olub.
Rusiya Xarici İşlər Nazirliyinin sözçüsü Mariya Zaxarova 5 sentyabrda Paşinyanın şərhlərinə cavab verib və bildirib ki, “günahı başqasına atmaqdansa, öz hərəkətlərinə görə məsuliyyət daşımaq lazımdır”.
Siyasətçi və dövlət xadimi ilə ölkəsinin milli maraqlarını düşünməyən yoldan keçən insan arasındakı fərq budur.
Mariya Zaxarova
Kremlin sözcüsü Dmitri Peskov isə deyib ki, “Rusiya təhlükəsizlik qarantı rolunu oynamaqda davam edir”.
Rusiya bu regionun ayrılmaz hissəsidir, ona görə də heç bir yeri tərk edə bilməz. Rusiya Ermənistanı tərk edə bilməz. Rusiya regionun sabitləşdirilməsində və münaqişənin həllində ardıcıl, çox mühüm rol oynayıb və bunu davam etdirəcək.
Dmitri Peskov
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
