Azərbaycana gələn Amerika Konqresmeni Frank Peloninin başı nə qaldığı oteldə dinc olub, nə də COP29 konfransı keçirilən ərazidə. 16 Noyabrdan etibarən onu ya Azərbaycan hökumətinin jurnalistləri, ya da Azərbaycan hökumətinin maddi olaraq dəstəklədiyi Qeyri Hökumət Təşkilatları “sınağa çəkir”. Jurnalistlər ona “ermənilərdən nə qədər pul aldığı” barədə sual verir, QHT sədrləri isə onun ABŞ-a qayıtmağını tələb edir.
Azərbaycan hökumətinin nəzarətindəki televiziyalar Frank Peloninin qaldığı oteli qarşısında aksiya keçirən QHT sədrlərdən aldığı müsahibələrdə yalnız onların adını verməklə kifayətlənib.
Mikroskop Media həmin QHT-ləri və onların son 3 ildə Qeyri-Hökumət Təşkilatlarına Dövlət Dəstəyi Agentliyindən nə qədər qrant aldığını araşdırıb.
Aksiyada hansı QHT-lər olub?
Mikroskop Media bir neçə TV-də yayımlanan sujetlərdən 7 QHT-ni müəyyənləşdirib. Aksiyada daha çox QHT iştirak etsə də yalnız müsahibələr əsasında kimin hansı QHT-nin sədri olduğunu müəyyənləşdirmək mümkün olub.
- “Gənclərin Anti-Narkomaniya” İB
- “Milli Dəyərlər üzrə Maarifləndirmə” İB
- “Sosial-İqtisadi və Ekoloji İnkişaf” İB
- Şəhid Ailələrinə “Qayğı” Cəmiyyəti
- “Ortaq Dəyərlər” İB
- “Sosial-İqtisadi və Kənd Təsərrüfatının İnkişafına Dəstək” İB
- “İnformasiya və Sosial Təşəbbüslərə Dəstək” İB
Kim, niyə və nə qədər qrant alıb?
“Gənclərin Anti-Narkomaniya” İB
2022-ci ildə:
- “Qadın adı: hörmət və xəyanət” sənədli filminin çəkilməsi və qızlar arasında Azərbaycanın milli-mənəvi dəyərlərinin təbliği – 8 000 manat
2023-cü ildə:
- “Həyatına dəyər ver” sosial çarxının hazırlanması və maarifləndirmə tədbirlərinin təşkili – 7 000 manat
“Milli Dəyərlər üzrə Maarifləndirmə” İB
2022-ci ildə:
- Məişət zorakılığına qarşı mübarizədə maarifləndirmə – 9 000 manat
2024-cü ildə:
- Milli dəyərlərin təbliğinə həsr edilmiş tədbirlərin təşkili – 9 000 manat
“Sosial-İqtisadi və Ekoloji İnkişaf” İB
2023-cü ildə:
- Əhalinin həssas sosial qruplarının mövcud sosial müdafiə mexanizmlərindən istifadə bacarıqlarının artırılması – 8 000 manat
2024-cü ildə:
- Kəlbəcər və Laçın rayonlarının iqtisadi resursları [red: layihənin adı belədir] – 9 800 manat
Şəhid Ailələrinə “Qayğı” Cəmiyyəti
2023-cü ildə:
- “Vətən yolunda addımlayanlar” filminin çəkilməsi – 9 000 manat
2024-cü ildə:
- Şəhidlərin qəhrəmanlığının təbliği – 9 000 manat
“Ortaq Dəyərlər” İB
2023-cü ildə:
- Güney azərbaycanlıların ana dili və azərbaycançılıq ideyaları ətrafında birləşməsi istiqamətində media platformalarında iş – 9 000 manat
2024-cü ildə:
- Xarici ölkələrdə yaşayan azərbaycanlıların haqlarının müdafiəsi – 16 100 manat
“Sosial-İqtisadi və Kənd Təsərrüfatının İnkişafına Dəstək”İB
2024-cü ildə:
- Sahibkar Qadınların Milli İnkişaf Strategiyasının hazırlanması – 11 000 manat
“İnformasiya və Sosial Təşəbbüslərə Dəstək” İB
2024-cü ildə:
- Qərbi Azərbaycanla bağlı informasiya mübarizəsi – 19 000 manat
