Dünya Səhiyyə Təşkilatı Çində 1 ay əvvəl başlayan və hazırda 16 ölkədə qeydə alınan koronavirusla bağlı bütün dünyada fövqəladə hal elan edib. BBC yazır ki, İsveçrənin Cenevrə şəhərində keçirilən mətbuat konfransında qurumun baş direktoru Tedros Adhanom Qebreyesus bildirib ki, bu qərarın səbəbi Çində yox, digər ölkələrdə baş verənlərdir.
Dünya Səhiyyət Təşkilatı virusun səhiyyə sistemləri zəif olan ölkələrdə yayılmasından narahatdır. T.A.Qebreysus qurumun virusla bağlı ötən həftə fövqəladə vəziyyət elan etməməsindən peşman olduğunu deyib və bunun insani səhv olduğunu bildirib.
Çində vəziyyət necədir: Çində indiyə qədər 170 nəfər koronavirusa yoluxandan sonra həlak olub. Milli Səhiyyə Komisiyasının yanvarın 30-da açıqladığı məlumata görə, koronavirusa yoluxanların sayı 7 min 711 nəfərə çatıb. 81 min nəfərin isə virusa yoluxduğu şübhəlidir və onlar nəzarət altındadır.
Xəstəliyin yayılmağının qarşısını almaq üçün çinli rəsmilər koronavirusun ilk dəfə yayıldığı Vuhan şəhəri və bu şəhərin paytaxtı olduğu Hubey əyalətində yaşayan 50 milyon insanı karantinə alıb.
Bütün ölkədə qoruyucu maskadan istifadə etmək zəruridir. Çinin futbol federasiyası ölkə super liqası da daxil olmaqla bütün ölkədəki futbol matçlarını təxirə salıb.
