İnsan hüquqları müdafiəsi təşkilatı “Amnesty International” Milli Şura Kordinasiya Mərkəzinin üzvü Tofiq Yaqublunun həbsi ilə bağlı prezident İlham Əliyevə məktub yazma kampaniyasına başlayıb.
Məktubda Tofiq Yaqublunun xuliqanlıqda ittiham olunduğu və onu 7 ilədək həbs cəzası gözlədiyi qeyd olunur. Bildirilir ki, Tofiq Yaqublu qəzanın qəsdən törədildiyini və ona irəli sürülən ittihamın əsassız olduğunu deyir. Təşkilat T.Yaqublunun ailəsinin onun səhhətindən narahat olduğunu da vurğulayır.
Məktubda qeyd edilib:
- Tofiq Yaqublunun dərhal sərbəst buraxılması və səhhətinin risk altında olmaması üçün lazımi addımları atın
- Tofiq Yaqublunun və ya Azərbaycandakı hər hansı bir şəxsin qanun pozuntularından şübhələnməsi üçün hər hansı bir əsaslı səbəb varsa, onların ədalətli mühakimə olunmalarını və əlaqəli hüquqların, o cümlədən vəkilə müraciət etmək hüquqlarını , onların vəkil tərəfindən təmsil olunma hüququnu təmin etmələrini təmin edin
- Tofiq Yaqubluya qarşı zülmə son qoyun və Azərbaycanda hər bir insanın ifadə azadlığı və sərbəst toplaşmaq hüquqlarından istifadə etməsini təmin edin
Nə baş verib: Martın 22-də Tofiq Yaqublu ona qarşı təxribat törədildiyi barədə məlumat yayıb. O bildirib ki, 8-ci kilometr bazarı yaxınlığında onun dayanmış halda olan maşını qəsdən vurulub və maşındakılar Tofiq Yaqubluya hücum edib. Bundan sonra siyasi fəala cinayət işi açılıb. O, ifadə vermək üçün dəvət olunsa da vəkili Elçin Sadıqov uzun müddət onun yanına buraxılmayıb. Martın 23-də isə Nizami Rayon Məhkəməsi onun barəsində 3 aylıq həbs qətimkan qərarı çıxarıb. T.Yaqublu Cinayət Məcəlləsinin 221.3-cü maddəsilə ittiham olunur.
“Amnesty International” nədir: İnsan hüquqları müdafiəsi təşkilatı olan “Amnesty International” uzun müddətdir ki, Azərbaycanda insan hüquqlarının pozulmasını sənədləşdirir. Təşkilat hesab edir ki, Azərbaycanda ifadə, birləşmə və dinc toplaşmaq hüquqları ciddi şəkildə məhdudlaşdırılır və ədalətsiz məhkəmə araşdırmalarından sonra bir çox jurnalist, hüquq müdafiəçisi və digər fəallar təqibə, zorakılığa, saxta ittihamlarla mühakiməyə və həbsə məruz qalıblar.
