Avropa Parlamenti Azərbaycan hökumətinin Dağlıq Qarabağda erməni mədəni irsini məhv etmək, inkar etmək siyasətini qəti şəkildə tənqid edən qətnamə qəbul edib. OC Media yazır ki, 635 nəfərin lehinə, 2 nəfər əleyhinə səs verdiyi, 42 nəfərin isə bitərəf qaldığı qətnamə İkinci Dağlıq Qarabağ müharibəsindən sonra Azərbaycanın nəzarətinə keçmiş 1456 erməni abidəsinə aid edilib.
Bu qətnamə Azərbaycan hökümətinin Qafqaz albanlarına xas olduğunu iddia edilən kilsələrdən erməni yazılarını silmək planlarını elan etməsindən sonra qəbul edilib. Qətnamədə həmçinin regionda “tarixin saxtalaşdırılması” və “qondarma Qafqaz Albanı” kimi təqdim edilməsi cəhdləri də vurğulanır.
Azərbaycan tərəfi nə demişdi:
- Prezident İlham Əliyev Tsakuridə yerləşən 12-ci əsrə aid erməni kilsəsindən erməni yazılarının silinəcəyini vəd edib;
- Mədəniyyət naziri Anar Kərimov fevral ayında bildirib ki, ermənilər tərəfindən Alban dini məbədlərinin üzərindəki “uydurma yazıların” çıxarılması üçün Azərbaycan hökümətinin “ekspert” işçi qrupu yaradılıb.
Qətnamədə Azərbaycan hökümətinin addımları beynəlxalq hüququn normalarının pozulması kimi dəyərləndirilib və Beynəlxalq Ədalət Məhkəməsinin (ICJ) hökmlərinə istinad verilib.
Qətnamədə başqa hansı məqamlar var:
- Son 30 il ərzində Naxçıvanda erməni mədəni irsinin məhv edilməsi məsələsinə də toxunulub;
- Azərbaycan höküməti 89 erməni kilsəsinə, 20 min məzarlığa və 5 mindən çox məzar daşına bərpası mümkün olmayan ziyan vurmaqda təqsirləndiriıib.
Qətnamədə həmçinin, II Dağlıq Qarabağ müharibəsindən sonra Azərbaycanın geri qaytardığı Ağdam və Füzuli şəhərlərinin Ermənistan silahlı qüvvələri tərəfindən demək olar ki, tamamilə dağıntıya və talana məruz qalması da qeyd olunub.
Avropa Parlamentinin Azərbaycana müraciəti:
- Azərbaycan hökümətindən UNESCO-nun Dağlıq Qarabağa girişinə icazəsi verməsi xahiş olunur;
- Azərbaycanı UNESCO-nun qiymətləndirmə missiyası gəlmədən öncə ermənilərin irsi obyektlərinə toxunulmasının qarşısını almağa səsləyirik.
Parlament rəsmi Bakı və İrəvana beynəlxalq hüquq normalarını, o cümlədən mədəni irsin qorunması ilə bağlı bütün iddiaları səmərəli şəkildə araşdırmağa çağırıb və qeyd edib ki, I Dağlıq Qarabağ müharibəsi həm də Azərbaycanın mədəni irsinin məhv edilməsinə səbəb olub.
